Ang sinugdanan anaa sa kataposan

Gula 28

“Maayo hinuon,” nagkanayon si Alexa. “Ako siyang giingnan nga mokuyog nato. Si Colleen ang buot ipasabot ni Alexa.

“Kay dili diay siya mokuyog?” Gisukit ni Yana si Alexa.

“Dili kuno,” maoy tubag.

“Kuyog na lang, Day,” ni Colleen ang girumbo sa sinultihan ni Yana. “Aron ba sab dili ko laayon didto. Ako ra bay way partner. Maayo kun naa ka aron kita na lang duha ang mag-uban sa pagpangaligo. Kay kini sila si Alexa ug Katrin, adto man gyud ni sila makig-uban sa ilang mga sweetheart.”

“Gikapoy man gud ko, Yana,” ni Colleen pa.

“Mawa’a ra lagi nang imong kapoy,” ni Yana. “Kuyog lang gud. Wa man kaha kay laing appointment ron. Basin ba’g may date ka karon.”

‘Wa, uy,” ni Colleen.

“Wa pay uyab ning akong manghod, Yan,” dason si Alexa.

Nadala gayod si Colleen sa agni nilang ate Alexa niya ug Yana. Mikuyog siya sa grupo sa pagpangaligo og dagat.

Nagsakay sila og multicab paingon sa Dalaguete. May uyoan diay si Rafal nga nanag-iya og multicab ug kini ang ilang gigamit nga kasakyan sa kondisyon nga sila lang ang mogasolina niini. Service car ra man usab ang maong multicab sa pamilya sa uyoan ni Rafal. -- Sumpayan pa