Abogado ang nibayad sa kliyente

Sa kaso nga giatubang ni Noy Rico, swerte siya kay may abogado nga nilaban niya og libre. Nagdahom siya nga di siya papahawaon sa tag-iya sa luna nga iyang gibalayan sa baryo Cordero ning dakbayan kay nakabayad na siya’g down payment. Si Atty. Sendo Calibo ang nilaban niya. Nag-atubang sila karong buntag sa complainant nga si Mr. Arman Sala, sa Mediation Office kay pabayron siya’g kinyentos mil pesos aron dili idayon iyang pagpapahawa.

Maayo ang pangita ni Rico kaniadto. Dako siya’g natigum nga salapi. Maninda lang siya’g mami, puso ug barbekyu sa daplin sa karsada atbang sa Green Meadow Emporium ning dakbayan. Alas sayis sa gabii siya magsugod og paninda. Kusog iyang paninda kay nasuki niya ang mga drayber ug dyip nga namarking sa duol. Dose oras iyang paninda. Inig ka alas sayis sa buntag moundang siya'g paninda. Matulog siya hangtod na's tingpaniudto.

Biyudo na si Noy Rico sa unang asawa. Way anak. Unya duna siya'y nakatipon nga biyuda sab. May usa sila ka anak. Si Gina nga dalaga na. Iyang kaipon nga si Nang Tering maoy katimbang niya sa preparasyon. Mao say moatiman niya sa higayon nga mopahuway siya. Nahigala niya si Maning nga usa ka sekyu sa emporium. Kay suki sab niya. Buotan si Maning ug nasayran niya nga ilo na siyang tuwapos. Kabus ug kagikan sa Mindanao. Nanimpalad siya sa Sugbo nga makatrabaho. Nakahigala siya’g sekyu ug narekomendar sa ilang agency. Ulitawo pa si Maning ug nag-abang lang og lawak sa dakbayan isip bedspacer. Giagni ni Noy Rico nga adto puyo sa ilang balay nga di layo sa emporium. Giisip ni Noy Rico nga anak si Maning.

Usa ka higayon, dunay babaye nga customer sa Emporium nga nabiktima og isnatser. Nadakpan ni Maning ang isnatser ug nabawi ang bag sa babaye. Dakong pasalamat sa babaye. Ug gitagaan si Maning og tarheta nga kun duna unya siya'y problema nga legal, di lang magdikidiki sa pagtawag sa iyang bana. Abogado diay iyang bana sumala sa napatik sa tarheta.

Nahisgutan ni Maning ngadtong Noy Rico nga duna siya'y nahigala nga abogado. Ug andam motabang kun iyang hangyoon. Niingon si Noy Rico nga imbitahon nila ang abogado ug iyang kapikas sa pista sa ilang baryo. Sukad adto, kada pista, bisita na nila ang abogado.

Niabot ang higayon nga nahurot ang dos milyones nga salaping natigum ni Noy Rico. Kay nahinag siya sa pagpangawot og treasure. Duna siya'y mga pag-umangkon nga nadagsa sa ilang dapit. Gipakita siya’g mga batong sinaw sa baybayon nga tilimad-on kuno nga dunay makawot nga mga bulawan sa baybayon sa Cordero. Dihang siyen mil pesos na ang nagasto ni Noy Rico, nagpakitambag siya sa abogado. Giingnan siya nga undang na anang kawotkawot sa bulawan. "Ang imong maayong negosyo, mao ang bulawan. Kalimti nalang tong nagasto. Isipang napildi sa masyaw." Wa nipatuo ang tiguwang. Nahurot gyud iyang kuwarta.

Unya sa niaging tuig, nakadawat siya'g suwat gikan sa barangay Kapitan. Papahawaon siya's yuta iyang gipuy-an. Niya pa, di siya mopahawa. Kay nakabayad na siya'g down payment sa yuta.Kun tinuod mang nakabayad, wa siya'y resibo o bisan unsang dokumento nga pinirmahan. Nagsunodsunod iyang dimalas. Namatay si Nang Tering. Giatake's kasingkasing dihang may nagwarawara og sundang sa ilang tugkaran. Gipamuril ang mga halaman libot sa ilang balay. Sugo sa tag-iya’s yuta. Kay bawion ang yuta. Unya gikan sa eskuylahan si Gina, nahanaw. Wa na mauli. Nagtaho nalang iyang klasmet nga best friend ni Gina, nga nikuyog si Gina'g lalaki. Nakigtaban. Kahikogon sa kalagot si Noy Rico.

Dihadiha niisyo og tseke ang abogado ngadto ni Mr. Sala, nga balor og kinyentos mil pesos. Gitunol niya sa tag-iya sa yuta nga daw di katuo sa hitabo. Gidawat sa tag-iya sa yuta.

"Balor og dos milyones nga mga alahas ang sulod sa bag nga naisnats. Wa gyud nangayo si Maning bisa'g peso nga premyo" ni Atty. Calibo, dihang nanggawas na sila ngadto sa parking lot. "Kun di pa tungod ni Maning, mahanaw na unta ang mga alahas sa akong misis. Busa gamay ra ang kinyentos mil pesos" dugang sa abogado nga nagpahiyom. Nigakos si Noy Rico sa abogado. Nitulo iyang luha sa kalipay. Nakahukom si Noy Rico nga maghikay siya sa ila ug iyang busgon pag-ayo si Maning. Ug iyang himuong legal ang pagsagop niya sa ulitawo. (Sa gustog libreng konsulta, dad-a ning pahina sa opisina sa tagsulat. Sa Sabado sa buntag)