Dinagmalan

Gula 5

“Grabeha adtong biyahe nato Rose uy, gilok kaayo ang akong buko-buko,” nagpahiyom si Reynan nga nangomedya ni Rosalinda nga klaro kaayo nga nakasabot sa kahulogan sa gisulti sa ulitawo kaniya.

Gipasabut ni Rosalinda si Reynan nga ingon gayud niini ang transportasyon sa ilang dapit ug nga wala na nila hatagi og malisya kun magbinag-iray ang lawas sa babaye ug lalaki.

“Naa nay sakyanan paingon sa dakbayan Reynan… mao na nay atong sakyan kay ila kana ni Rene Alquisola nga bus,” giingnan ni Rosalinda ang ulitawo nga umaabot niya nga agawon.

Nagtupad sila sa paglingkod sa bus. Daplin sa bentana maglingkod si Rosalinda nga usahay makatagpilaw ug mahasandig kaniya ang dalaga. “Sori kaayo Reynan ha, nakatagpilaw man diay ko, napasandig hinuon ko nimo da,” sa dalaga pa.

“Ayaw kabalaka Rose, sige katulog lang diri sa akong abaga,” giingnan ni Reynan si Rosalinda dungan sa pag-agbay kaniya aron nga mosandig kini sa iyang abaga.

Bisan og katabang ra sa balay ang pagkuha ni Reynan kang Rosalinda, apan daw hinay-hinay nga gitukbil ang kasing-kasing sa ulitawo sa kaibog sa dalaga. Alang ni Reynan usa ka maanyag nga bulak si Rose sa tanaman sa kabukiran.

Kon may makakita kanila ni Reynan ug Rosalinda, magtuo gayud nga silang duha dunay relasyon.

Wala makatulog si Reynan sa iyang sitwasyon. Usahay mapalid ngadto sa iyang nawong ang buhok ni Rosalinda nga daw nakatagpilaw g’yud samtang nagdagan ang sakyanan paingon sa dakbayan.

Paglabay sa usa ka oras kapin, miabut na ang gisakyan nila nga bus sa south bus terminal. Misakay sila’g taksi paingon sa balay nila ni Reynan. “Pa, si Rosalinda ang akong kauban. Gusto siya nga motrabaho dinhi sa dakbayan ug nahukman nako nga dinhi na lang siya kay aron may kauban kamo kun wala ko,” ni Reynan pa.

 “Maayong hapon Sir, Ma’am,” nangatarungan si Rosalinda sa mga ginikanan ni Reynan. “Tawga na lang ko og Manang Sebia ug kining akong bana Manong Loring,” matud sa inahan sa ulitawo.

Gihatud ni Reynan si Rosalinda sa bakante nga kwarto nga maoy iyang estahan. “Mao kini ang imong kwarto Rose… Sige ipahimutang ang imong mga gamit ug bahala ka na nga motabang nilang Papa ug Mama.” (Sumpayan)