Mga dabong sa kawayanan

Nangursonada si Henry ning buntaga. Human gitakin sa iyang kilid ang sundang uban sa sakuban niini, mipadayugdog siya ngadto sa labong punoan sa kawayanan nga gipanag-iya sa iyang lolo Anong. Wa

siya mananghid sa iyang lolo.

Nakahukom siya sa pagpanguha og mga dabong nga nasiklapan niya sa miaging adlaw nga morag mga uhong nga misubol na sa nagsikit nga mga punoan sa naglumbay'ng kawayanan. Gikontak na niya si Noy Mariano, ang mangumprahay og utanon sa ilang baryo aron itumod sa siyudad, nga maoy baligyaanan niya sa makuha niyang mga dabong.

Ang lolo ni Henry maoy bugtong nanag-iya og kawayanan sa ilang baryo sa labing dasok ug labong nga mga punoan niini. Ang kawayanan maoy nakahatag og kaharuhay sa pagpuyo sa iyang lolo Anong. Daghan ang mamalit og mga bulos sa kawayan, ilabi na sa mga guod.

Hilabihan man gud ang pagsanay sa tinuboan sa kawayanan sa iyang apohan tungod sa gibutang nga abiso niini nga gisulat sa tabla, sa pagdili gayud sa pagpanguha sa mga dabong.

Gawas pa, mibati sab og kahadlok ang baryohanon sa pagpanghilabot sa mga tanom sa iyang lolo Anong, tungod kay nabaniog usab kini nga barangan ug may binuhing mga mananap nga katingalahan. Busa, way nangahas sa pagpanguha sa mga dabong niini sa dasok nga punoan sa kawayanan.

"Ayaw gyud mo'g pangahas sa pagpanguha og mga dabong sa akong kawayanan! Kuyaw kun adunay mahitabo ninyo...!" kini ang gipasidaan sa lolo ni Henry ngadto kanilang tanan, lakip na sa iyang papa Binog, mama Lita ug manghod niyang si Jimmy.

Sanglit ulitawo pa ug bag-ong naadik sa sugal nga tong-its nga nauso sa ilang baryo, nangita gyud og paagi si Henry nga makakuwarta. Hilom siya nga namaligya og hinog nga mga nangka ug pinya sa ilang umahan. Gani, daghan na nga mga tali sa misanay nilang manokan ang iyang nasigmit ug gibaligya aron lang gayud makakuwarta. Unya, misantop sab dayon sa iyang hunahuna nga supakon ang pasidaan sa iyang lolo Anong. Manguha siya og mga dabong!

Nahasibog si Henry sa pagsuong niya sa unang labong ug dasok nga punoan sa kawayanan diin nagpasad sa paggimaw ang daghang mga dabong. Ang mga dabong sa iyang lolo, gibantayan sa usa ka dakong sawa nga nagluko. Naseguro niya nga inigdugsak niya sa mga dabong, matandog gayud ang nagluko nga lawas sa dakong sawa. Bitbit ang hait nga sundang, nagdali nga mibalhin si Henry sa laing dasok nga punoan sa kawayanan sa unahan. Kinahanglan gayud nga makuha siya og mga dabong aron siya makakuwarta ning buntaga.

    Misuong na usab si Henry sa ilawom sa kawayanan. Mingislit ang iyang pahiyom nga nagpasiklap sa nanagtuybong mga dabong. Wala pa gani siya makaduslak sa iyang sundang sa mga dabong maoy nasigpatan niya ang ulo sa dakong sawa nga nag-atubang kaniya. Gibantayan gihapon og sawa ang mga dabong sa iyang apohan.

Nagkibotkibot ang baba ni Henry nga mipalayo sa punoan sa kawayanan. Mao diay nga way makapangahas og panguha sa mga dabong sa kawayanan sa iyang lolo Anong kay may mga guwardiya kining sawa ilawom sa kawayanan. Miiknat ang iyang kilay ni Henry nga naghunahuna sa matang sa abilidad nga nahuptan sa iyang apohan. (Kataposan)