Naghilak nga Bituon

Gula 67

Wala motingog si Jackie. Samtang namati sa gisulti sa iyang manager, nag-anam pagbulto ang iyang kalagot ngadto kang Flip.

“Usa lang ka butang ang angay mong buhaton, Jackie, kun gusto kang maluwas ang loveteam ninyo ni Jerome, ug kini mao ang pagpili.”

“U-unsay buot mong ipasabot?”

“Mamili ka, Jackie. Ang imo bang career? O si Flip Garcia?”

Miduko si Jackie. Nakasabot dayon siya sa gisulti sa iyang manager. Buot niini nga putlon niya ang relasyon nila ni Flip.

“Kun naghatag ka pa og bili sa imong career, Jackie,” ni Joy Lorenzo pa,” buwagi si “Flip Garcia.”

Nakakat-on na unta si Jackie sa paghigugma kang Flip. Apan giguba niini ang ilang gikasabotan. Gimahal niya ang iyang career busa kinahanglang isakripisyo niya ang ilang relasyon.

“Okey,” hukom ni Jackie. “Makig-break ko ni Flip.”

Domingo sa gabii. Sama sa naandan, bisita ni Jackie si Flip. Karon lang sila nagkita sukad sa gihimong rebelasyon sa lalaki mahitungod sa ilang relasyon. Wala gani kini manawag o mo-text man lang niya. Wala usab mo-attempt si Jackie sa pagkontak niini. Gihulat niya nga si Flip mismo ang makigkita kaniya.

Uga ang tinagdan ni Jackie kang Flip. Nagmug-ot ang iyang nawong nga nakig-atubang sa lalaki. -- Sumpayan pa