Dinagmalan

Nabatasan na ni Reynan nga matag Sabado ug Domingo basta wala lay uwan mangayam g’yud siya sa kalasangan isip maoy iyang kalingawan. Si Loreto nga iyang silingan sa barangay Zapatera maoy sagad niya kauban.

Apan karong semanaha wala makauban kaniya si Loreto kay gihilantan. Kaadlawon pa nga migikan si Reynan paingon sa Barili kay nakadungog siya nga dunay dapit nga gitawag og Hilasgasan nga daghan kunong dagkong langgam ug unggoy.

Labong ug tag-as tuod kaayo ang mga kahoy apan gidemalas tingali si Reynan kay wala g’yud siya’y kuha. May pagka idlas ang mga langgam ug dunay tulo ka unggoy nga iyang nakita apan kalit lang nangahanaw sa iyang panan-aw.

Naghinay-hinay na paglakaw si Reynan sa balay sa barangay kapitan nga maoy sagad niya buhaton nga adto matulog sa Sabado sa gabii, aron inigka-ugma mopadayon na usab siya sa pagpangayam.

Samtang naglakaw paingon sa balay nga gitudlo kaniya nga maoy gipuy-an sa barangay kapitan, nakadungog si Reynan og hilak sa usa ka babaye. Daw gikasab-an kini og tawo nga sa iyang bana-bana hubog… unya gibunalan.

 Nagpakilooy ang babaye. Nasabtan ni Reynan nga ang babaye gibunalan sa iyang amahan. Gibati si Reynan og kalooy apan mipadayon lang siya paglakaw paingon sa balay sa kapitan. Tuod, mahinangpon nga gidawat si Reynan sa kapitan.

“Sige dinhi ka lang sa balay magpalabay sa gabii Dong… walay problema dinhi kay malinawon kining among dapit,” matud sa kapitan.

Nagsultihanay sila si Reynan ug ang kapitan, dihang kalit lang dunay misinggit. “Capt, gidala namo dinhi si Rosalinda kay gidagmalan na usab sa hubog niyang amahan nga si Pascual.” Si tanod Clemente diay ang miabut nga may kaubang babaye.

“Pastilan, misugmat na usab diay ang iyang pagkadagmalan. Mas maayong kuhaon nimo si Pascual aron atong mahusay kining hitaboa,” sa kapitan pa ngadto sa tanod nga dali kaayong mibiya aron pagkuha ni Pascual.

Gisuginlan sa kapitan si Reynan nga makadaghan na kini nga higayon nga bun-ogon ra ni Pascual ang anak niya dalaga. Gitan-aw ni Reynan ang babaye nga nagkalkag na ang buhok ug naghilak.

Nahinumdom si Reynan nga samtang naglakaw siya paingon sa balay sa kapitan nakadungog siya nga may babaye nga daw gibunalan ug gikasab-an og lalaki. (Sumpayan)