Sulagma nga Panagkita

Gula 7

Bisan og maskulado si Larry apan wa g’yud siya’y dag-anan kang Ronel. Naninguha nga motindog si Larry gikan sa gihagbaan niya nga sawog mao nga gitabangan siya ni Ronel nga makatindog.

Apan dihang hapit na makatindog si Larry kalit niya nga gibunlot ang kamot ni Ronel sa tumong nga malukapa ang ulitawo sa sawog. Gikulbaan pag-ayo si Janet sa iyang nakita apan abtik si Ronel nga mibalitok.

“Mabudhion ka g’yud diay Larry. Gitabangan ko pa gani ikaw aron makatindog apan buot mo nga mobali ang sitwasyon ug mopabor kanimo ang higayon… apan nasayop ka!” daw naisog na pag-ayo si Ronel.

Giatake na niini si Larry nga natagbaw og panagang sa mga patid ug sukmag. Wala makaagwanta, natumba pag-usab sa sawog si Larry. Nagkadugo na ang iyang nawong.

May nadungog sila nga tuktok didto sa pultahan. Gidali paglili ni Janet sa bentana. Ang iya diay’ng mga ginikanan ang miabut. Gibuksan ni Janet ang pultahan ug nakurat pag-ayo ang iyang mga ginikanan pagkakita sa sitwasyon.

“Unsa kini Janet?” nakapangutana ang inahan, samtang napasiga ang mga mata sa iyang amahan.

“Ma, Pa, siya ang lalaki nga giingon nako ninyo nga maoy rason nga mobalhin ko pagpadistino sa Manila kay samok kaayo,” ni Janet pa. “Mao ba, siya diay si Larry?” matud sa amahan.

Gisuginlan ni Janet ang iyang mga ginikanan sa nahitabo. Nagpaminti sa kasuko ang amahan sa dalaga. Gisikaran niini si Larry nga naglingkud na sa sawog.

“Pasayloa ko Janet… Sir, Maam, pasayloa ko sa akong pagsamok sa inyong anak. Sori kaayo Janet,” hinay na ang sinultihan ni Larry. “Ayaw na g’yud pagsamok kanako Larry kay kaslonon na ko,” ni Janet pa. Napasiga ang mga mata ni Ronel nga nakadungog sa gisulti ni Janet. Gipasiplatan siya sa dalaga nga mipahiyom. “Mao kini ang akong pamanhonon Larry, siya si Ronel,” matud ni Janet dayong gakus sa ulitawo.

Mitindog paghinay si Larry ug nakiglamano kang Ronel. “Sori kaayo Bay,” matud ni Larry ngadto kang Ronel. “Pasayloa usab ko Larry nga nakadagmal nimo,” ni Ronel nga miagbay ni Larry.

“Ma, Pa… wala ba kamo’y pagsupak kun magpakasal mi si Ronel?” gisukna ni Janet ang iyang mga ginikanan. “Ikalipay kaayo namo Janet kun siya ang imong mabana.”

Taud-taud, nagkinataw-anay sila si Janet ug Ronel. “Sulagma kaayo no ang atong panagkita tungod lang sa concert sa Cebu Coliseum?” ni Janet pa.(Kataposan)