Ang sinugdanan anaa sa kataposan

Gula 21

Wala makatingog si Colleen. Nahimut-okan siya sa gipamulong ni Cody. Tinuod nga siya’y hinungdan kun nganong nagkahimamat sila si Cody ug Alexa. Tungod kay suod niyang higala si Cody, may mga higayon nga mokuyog kini kaniya sa ilang gipuy-an sa Banawa. Daghan gani ang nagtuo nga nangulitawo si Cody kaniya kaniadto. Lakip siya nagdahom nga naglaraw si Cody sa pagpanguyab kaniya ug nagpaabot lang kini sa tukmang        panahon.

Apan dili siya ang gipangulitawhan ni Cody kundili ang iyang Ate Alexa. Ingon gani sa nagmahay siya kun nganong gipaila pa niya si Cody ngadto sa iyang maguwang nga misangpot gayod sa paghigugmaay sa duha. Nakugang na lang siya usa ka adlaw niana dihang iyang nasayran nga nagkarelasyon na sila si Cody ug Alexa. Gibati niya ang tumang kahisagmuyo niadtong tungora.

“Gipakaingon ko’g boyfriend nimo kadtong lalaki nga imong gikauban didto sa E-mall,” namulong si Cody taliwala sa iyang kahilom.

“A-ang hain niadto?” Mikunot ang agtang ni Colleen.

“Kadto gong imong gikauban sa E-mall niadtong miaging semana,” ni Cody pa. “Nakita ko kamong duha nga nagsultihanay sa may foodcourt. Wa lang ko moduol ninyo kay tingali’g makadisturbo ko.”

“A,” ni Colleen pa nga nahinumdom na. “Si Brendan kadto. Tinuod, nangulitawo siya nako. Pero wa siya makadama sa akong kasingkasing.” -- Sumpayan pa