Ang sinugdanan anaa sa kataposan

Gula 20

“Oo,” tug-an ni Colleen. “Niadtong Sabado, didto si Jack sa ba’y.”

“Mao ba?”

“Lagi. Pero wa siya atubanga ni Ate Alexa. Ako’y nakigsulti kang Jack kay si Ate naglikay kaniya.”

Wala motingog si Cody.

“Wa kay angay kabalak-an,” nagkanayon si Colleen. “Nasayod kong pilit kaayo si Ate nganha nimo. Dili ka niya ibaylo kang Jack.”

“Nasayod ko niana,” ni Cody pa. “Misalig ko sa kamatinud-anon ni Alexa sa among relasyon.”

Si Colleen na usab ang mihilom. Wala na siya ganahing mitubay sa gisulti ni Cody. Mipaspas siya sa pagkaon.

“Ikaw, Colleen,” matud ni Cody. “Wa ka pa bay hinigugma hangtod karon?”

“W-wala pa,” mubong tubag ni Colleen.

“Uy, ngano man? Sa imong kaguwapa, zero balance ka pa?”

“Wa pa tingali moabot ang panahon nga makabaton ko’g boyfriend. Wa pa nako ikahimamat ang akong ideal man. Diha na unta to sa una, pero dili diay siya alang kanako.”

Ang ulahi niyang gisulti maoy usa ka pasumbingay alang kang Cody. Apan nagtuo siyang wala kini makatugkad sa lintunganay sa iyang gipamulong kay igo man lang kining mipakibo sa abaga.

“Ingon gyud niana ang gugma,” nagkanayon si Cody. “Ako bitaw, dugay man sab nakong gikahibalag ang babaye nga angay kong higugmaon. Kun dili pa tungod nimo, dili kami magkahimamat si Alexa.” -- Sumpayan pa