Anak nga abusador

Gitugahan sa Diyos og upat kabuok anak ang managtiayon nga si Simon ug Nita nga iyang asawa. Kamanghorang anak si Banjo. Kumo kay kinamanghuran lagi, buhong kaayo siya sa mga bisti, pagkaon lakip na sa salapi isip "pocket money".

Kusog ug paspas kaayo ang ligid sa panahon. Ulitawo na si Banjo ug nagtungha na siya karon sa kolehiyo sa dakbayan.

Yutaan ang kahimtang sa iyang mga ginikanan ug nanag-iya usab sila og dakung tindahan sa ilang dapit. Kompleto ang tindahan sa mga bugas, sotfdrinks, mga linata ug sa ubang kinahanglanon sa panimalay.

Busy kaayo ang mga ginikanan ni Benjo sa pag-atiman sa ilang negosyo ug sa pag-asikaso sa ilang mga kayutaan. Gumikan niini, wala nila mamonitor ang mga kalihokan ni Banjo sa ilang eskuylahan.

Samtang ang tulo niya ka mga igsoon hapit na makatapos sa ilang pag-eskuyla kay nagtinarong sila ug gilikayan ang mga barkada ug uban pang matang sa bugoy-bugoy nga walay hinungdan.

"Hapit na makatapos sa pagtuon ang imong mga igsoon Banjo ug akong gusto nga mahisama ka unta kanila. Kamanghuran ka namong anak ug mao ra kanay among ikabilin ni mama nimo nga di gyud mawagtang ug makuha gikan kanimo," nagkanayon si papa Simon niya usa ka higayon niana.

Ug mipadayon kini sa iyang pamulong, "Kining mga katigayonan nato karon mahanaw ra kini sa usa ka pamilok apan ang edukasyon kon kinaadman magpabilin gyod hangtod sa kahangturan."

Naminaw lang ug nagpitokpitok ang mga mata ni Banjo. "Pagtinarong intawon sa imong pagtuon ug likaye ang barkada," pahimangno sa iyang amahan ug dayong sakay sa kotse padulong sa ilang tindahan.

Walay kalibutan ang iyang mga ginikanan nga taudtaod nang nagbarkada si Banjo. Inom diri, inom didto. Suroy diri, suroy didto. Babaye diri, babaye didto. Haruhay si Banjo kay daku siya’g pocket money kay kamanghuran sa pagkaanak.

Pinasagdan siya sa iyang gusto. Hangtud ang kwarta nga igbabayad sa eskuylahan nadala sa ratsada. Gigasto niya sa hapi-hapi uban sa mga barkada. Usa ka higayon niana, gisekreto og kuha ni Banjo ang pistola sa iyang amahan nga gitipigan sa aparador.

"Karon, may armas na ako. Pusilon ko si Peter kay giiring-iringan niya si Lucy nga akong uyab," naminti si Banjo samtang nagpadulong siya sa ilang abutanan nga mga barkada.

Bang! Bang! Bang! Milanog ang tulo ka mga buto sa pistola sa pag-abot ni Banjo sa ilang abotanan.

"Arrgh!" miagulo si Peter dayong kahagba ug nahunosan gyud sa iyang kinabuhi niadtong higayona.

Mipauli dayon si Banjo sa ilaha apan gisundan siya sa mga polis. Sa pagsulod niya sa ilang panimalay nakita niya ang iyang mga ginikanan nga nagkaon sa lamesa.

Taud-taod misunod usab pagsulod ang mga polis.

"Unsay ato mga tinugyanan sa balaod?" pangutana ni Simon ngadto sa mga polis.

"Dakpon namo si Banjo kay nakapatay siya’g tawo," tubag ni pa Inspector Cruz.

"Sige, dalha ninyo siya aron mabayran niya ang salang nahimo. Gihatagan ko siya sa tanang kapretso sa kinabuhi apan way igabalos. Salbahis ug wa koy anak nga abusado!" Mao kadtong katapusang mga pulong nga nabati ni Banjo gikan sa iyang amahan.

Busa di nato usikan ang mga paningkamot ug kabudlay sa atong mga ginikanan alang sa masanag natong kaugmaon sama kang Banjo ning atong sugilanon. (Kataposan)