Naghilak nga Bituon

Gula 61

Nakabantay si Jackie nga may text message usab sa usa niya ka cellphone. Gikan gihapon kang Flip ang maong mensahe nga nagkanayon: “U captured something nsyd of me. U myk all of my dreams come true.”

Human mabasa ang maong mga mensahe, nasuta ni Jackie nga gitinuod gayod ni Flip ang pagpangulitawo kaniya. Bisan pinaagi sa text nagpadayon si Flip sa pagpangamoral kaniya.

Wala na niya tubaga ang text ni Flip. Nagdali-dali siya’g ilis. Mamahaw pa ra ba siya. Dili siya buot nga maulahi sa ilang taping karong adlawa.

Nagpadayon gayod si Flip sa pagpangulitawo kang Jackie. May mga higayon nga gusto ni Flip nga mobisita kaniya atol sa iyang taping. Apan gidid-an niya si Flip. Dili siya buot nga masayod si Joy Lorenzo, ang iyang manager, nga may usa ka businessman nga nangulitawo kaniya.

Kun tugotan niya si Flip nga makabisita sa iyang taping, seguradong mabaniog dayon pinaagi sa himantayong taga entertainment press ang pagpangulitawo niini kaniya. Ug nakaseguro siya nga dili magustohan ni Joy Lorenzo ang maong isyu tungod kay seguradong makaapekto man gayod kini sa loveteam nila ni Jerome Celesta. Mao nga hide to the max si Jackie mahitungod sa pagpangulitawo ni Flip kaniya.

Gitugotan hinuon niya si Flip nga makabisita sa townhouse nga iyang gipuy-an sa Laguna sa usa ka semana. Sagad nga sa Domingo sa gabii mobisita si Flip kaniya. Matag bisita ni Flip, magdala gayod kini’g regalo alang kaniya. -- Sumpayan pa