Gula 18
“Kun ako lang maoy higugmaon sa imong Ate,” ni Jack pa ngadto kang Colleen, “dili gyud siya magmahay. Di gyud nako siya paabogan kun magminyo na mi. Isakay ko siya kanunay sa akong Mustank.”
Wala motingog si Colleen. Milingiw siya kang Jack ug nanglimuok sa hilom. Gihilasan siyang namati sa sinultihan ni Jack. Miandar na usab ang pagka-huwabon niini.
“Ipang-regards na lang ko ni Alexa,” matud ni Jack dayong panamilit.
Mitando si Colleen.
Lunes sa udto. Paggawas ni Colleen sa main lobby sa unibersidad nga iyang gitunghaan, nakugang siya dihang iyang nakita si Cody nga misugat kaniya. Nagtingsi kini nga mitimbaya kaniya.
“Kaganina ra kong naghuwat nimo,” ni Cody pa.
“Ngano man?” sukit ni Colleen.
“Imbitahon ko unta ka og paniudto,” sa lalaki.
“Kauban si Ate?”
“No...wa mi magkuyog. Bale, kita rang duha... kun okey para nimo.”
“Pero...unsa may okasyon?”
“Wa lang. Gusto lang kong magkasulti ta’g maayo. Nalimot ka na nga kita’y unang nagkasuod. Pero sukad nga nagkarelasyon mi si Alexa, wa na ta magkakuyog. Di na gani ta hapit magkasulti.” -- Sumpayan pa