Ang sinugdanan anaa sa kataposan

“Nganong ako man gyud?” Sukit ni Colleen. “Di ko ganahang makig-atubang nianang lalakiha,” ni Alexa.

“Labaw na kong di ganahan niya.”

“Pero mas bentaha kun ikaw ang makig-atubang niya kay wa man siya mangulitawo nimo. Dili kaayo siya magsamok nimo.”

“Pero ikaw ang iyang tuyo.”

“Sagdi lang gud. Pakigsultihi lang.”

“Unya, unsa may akong ipangatarongan nganong wa ko moatubang niya?”

“Pangita lang og alibi. Ingon nga lain ang akong pamati sa akong lawas.”

“Sige. Pero kun dili siya motuo?”

“Aw, bahala siya.”

Tuod man, si Colleen gayod ang nakig-atubang kang Jack sa sala. Gipasabot niya si Jack kun nganong dili makaatubang niini si Alexa. Gibakakan niya ang ulitawo nga may sakit ang iyang maguwang.

“Mora’g wa man gyu’y amor nako ang imong maguwang, uy,” ni Jack pa. “Hangtod karon, mora’g wa pa gyu’y timailhan nga may chance ang akong gugma niya.”

“Ikaw na lang ang maantigong mosabot ni Ate, Jack,” ni Colleen pa. “May hinigugma na man gud kana siya.”

“Kadtong Cody?” Sukit ni Jack.

Nakaila si Jack kang Cody tungod kay nag-abot silang duha sa balay nila ni Colleen usa niana ka higayon. -- Sumpayan pa