Balik intawon

Samtang nag-impake si Dante sa iyang mga gamit, may nangayo og katahuran. Iya kining gilili sa pultahan, aron pagtino kun kinsa. "Uy! Lormel, dayon. Unsa may ato, beautiful? Lingkod una," iyang giagda ang dalaga.

"Asa ka man, Dan, nga nag-impake ka man?"

"Mopalayo nalang ko, Lor, adto's Manila kay wa man gyud ko nimo sugta."

"Unya ang imong duha ka anak, imong dad-on?"

"Ibilin ko lang una sa ilang mama, unya ko lang sila kuhaa kun duna na sila'y ikaduhang inahan."

"Kay magminyo diay ka didto, Dan?"

"Aw, asa man diay na paingon nga biyudo man ko."

"Ari lang nako ibilin ang imong duha ka anak, Dan."

"Ayaw oy! Unsa na lay isulti sa atong mga silingan?'

"Unya, kun sugton ta ka karon, modayon ka pa's Manila?"

"Hah! Tinuod ka, Lor!" Nakalitan si Dante sanglit kapin na sa tuig niyang pangulitawo sa dalaga.

"Oo, Dan, unya di kana modayon sa Manila?"

Miduol si Dante sa dalaga ug gikuptan ang duha ka abaga niini, ug namulong, "Lor, imo akong gilipay sa imong giingon, daghang salamat, Lor nga wala ko nimo pakyasa," dayong gakos sa dalaga ug giukoban ang mga ngabil niini. Samtang naggakos ang duha, nabati nila ang tugtog sa juke box sa duol nga tindahan nga ang kanta, "Goodbye, I hate to see you but have a good time. So long I missed you dear, I know but have a good time."

"Ayaw na lang og dayon sa Manila, Dan."

"Ako lang tan-awon ning offer nila nako, Lor, ug kun di ko makaayon, mouli dayon ko kay duha ra ka semana ang akong leave. Apan kun makaayon ko, kuhaon taka ug magpakasal ta sa labing madali. Uyon ka ba ana, beautiful?"

"Uyon ako, Dan, pero balik gyud intawon kay karon lang nako batia nga ikaw gyud ang akong mahal."

"Salamat Lor, salamat," ug gihagkan pag-usab ang mga ngabil sa dalaga. Human sa ilang panamilitay, nanganaog ang duha aron mag-atang og sakyanan si Dante paingon sa siyudad.

Pagsakay ni Dante, wala kapugngi ni Lormel ang mga luha nga midagayday sa iyang mga aping samtang mitugtog ang juke box.

"Kumakaway ka pa irog ng akoy iwan. Upang tumungo sa ibang bayan. Isang panyong puting-puting ang aking tangan, basangbasa ng luha kong di mapigilan."

"Balik intawon, Dan, balik intawon," nagkanayon si Lormel samtang nagkalayo ang gisakyan ni Dante. (Katapusan)