Naghilak nga Bituon

Gula 57

Bisan dili pa kaayo niya sinati apan nailhan niya ang tag-iya sa tingog sa lalaki nga didto sa pikas tumoy sa linya. Si Flip!

“Unsay akong ikaalagad nimo nga nanawag ka man?” Sukit ni Jackie.

“Gusto lang kong mag-check kun hain ka na karon,” ni Flip pa.

“On the way ko paingon sa akong gipuy-an nga townhouse sa Laguna.”

“Sa Laguna diay ka nagpuyo?”

“Oo. Sa Cabuyao.”

“Puyde bang makabisita sa imong gipuy-an?”

“Nga-nganong dili? Pero hectic kaayo ang akong schedule. Karon lang ko nakalugar kay nangayo ko’g day off sa akong manager ug wala una ko mo-guest sa Sunday variety show sa UBS-CVN. Sa sunod Domingo mobalik na ko pag-guest. Ug tingali, makapauli ko sa balay mga four o’clock na.”

“Tayming. Motambong ko og conference sa Tagaytay sa sunod Domingo. Inigbalik nako sa Manila, mahimo bang mohapit ko sa imong gipuy-an?”

“S-sure...”

Ug gihatag ni Jackie ngadto kang Flip ang sketch sa eksaktong lokasyon sa townhouse nga iyang gipuy-an.

Nagtuo si Jackie nga nagkomedya lang si Flip. Apan nianang pagkasunod Domingo mitungha ang lalaki sa iyang gipuy-an sa Laguna. Gabii na kining nahiabot sa iyang townhouse. -- Sumpayan pa