Abogado ray malipayon

Attorney, nakamatikod ka ba nga mga abogado ra may malipayon karong buntaga? pangutana sa usa ka hamtong lalaki ngadto ni Atty. Ernie Doble sulod sa husgado. Siya ray abogado nga way kaistorya kay nagbasa lang og Reader's Digest. Nagkaguliyang ang mga tawo, mga abogado ug mga kliyente ning alas nuybe i-medya na sa kabuntagon.

 Unya wa pa nagsugod ang bista. Wa pa niabot ang huwes sa Municipal Trial Court, Branch 10, sa lungsod sa Urbina. Dunay kuwarenta ka kasong bistahonon sumala sa kalendaryo sa husgado. Ang schedule sa mga kaso, puro 8:30 o'clock in the morning. Sa gidaghanon sa kaso, labing minus, ang naa sulod sa husgado usa ka gatos ka tawo. Kay kada kaso, may duha ka abogado mag-atbang ug duha sab ka kliyente mag-atbang. Maong nagkaguliyang karon. Saba kaayo ang mga abogado nga nanag-istorya ug nanagkomedyahanay. Lanog kaayo ilang mga bahakhak ug katawa.

Naglingkod si Ernie sa lingkuranan dikit sa taas nga lamesa sulod sa husgado. Mao ning lamesaha ang gitawag og lawyer's table. Dunay walo ka lingkuranan sa abogado. Apan kadaghanan sa mga abogado nanagtindog lang samtang naghuwat sa huwes. Si Ernie ray naglingkod kay bag-o pa siyang pasar sa bar exams. Wa pa siya’y usa ka tuig nga nagpraktis og panglaban. Wa pa siya ilhi sa mga abogadong dugay nang nanglaban. Gani, kining iyang pag-anhi sa husgado, duna siya’y gilabanan nga gikiha og Slander. Wa pa niabot iyang gilabanan.

Sukad pa gyud sa iyang pagka-estudyante, time conscious man gyud siya. On the dot gyud iyang iabot sa eskuylahan. Ug nabatasan gyud niya nga kinse minutos sa di pa moabot ang oras sa sabot, niabot na siya sa abutanan. Bisag alas diyes pa moabot ang huwes, alas otso medya, naa na siya sa husgado. Punctual gyud siya kaayo. Di siya gustong maoy huwaton sa huwes. Siya ang maghuwat sa huwes kay ang huwes, bisag unsa ka dugay niyang moabot, di man gyud ma-late ang huwes. Di man kasugod ang bista og way huwes.

Nakapahiyom si Ernie sa pangutana sa tawo. Giyahat niya ang tawo nga nagbarog dapit sa iyang tuo. Susamag gitas-on niya ang tawo. 5'6" man ang height ni Ernie. Cowboy og costume ang tawo. Nagkawo og sama sa kawo sa mga cowboy sa pahinumdum sa sigarilyong Marlboro. Nag-T-shirt og puti nga may marka "New York". Nagkarsones og maong. Nagsapatos og guma nga imported. Daw barber ang buhok sa tawo nga natabonan sa kawo.

Aron pagsuta kun unsay iyang matubag sa pangutana sa tawo, gipalibot ni Ernie iyang mga mata sa tibook husgado. Nakaagik-ik siyag kadiyot. Ang mga tawo nga nanaglingkod sa audience seats, mga seryoso kaayog mga nawong. Way nagkatawa ug nagpahiyom. Pihong way kalipay. Kay nahadlok nga dili moabot ang huwes, ug ma-postpone na sab ang mga hearing. "Husto ka, mga abogado ra gyuy malipayon. Kinsa man diay imong abogado?" ni Ernie gisira niya iyang Reader's Digest. Gipatong sa ibabaw sa iyang diary ug folder nga naplastar sa ibabaw sa lamesa dapit sa iyang atubangan. "Si Atty. Tibon. Wa pa niabot" sa tawo. "Lingkod una," agni ni Ernie."Bilib ko nimo. Maayo gyud kang maniid. Pero nakahibalo kag nganong mga abogado ray malipayon?" ni Ernie. "Wala lagi" sa tawo. Nagpabiling nagbarog.

"Ang mga abogado malipayon, kay mahinayon ang hearing ug sa dili, mahinayon man gyud silag kolekta og appearance fee. Ang mga kliyente masulob-on kay makabayad pa silag appearance fee sa abogado, unya wa pa gyud niirog ang mga kaso" ni Ernie. Nagpahiyom. "Nakabasa man ko sa Vision Statement sa Judiciary. Aw nia man gani na’s bongbong karon sa husgado. Mora mag lip service lang na o plantalya man lang. Adorno ra gyud sa husgado ang mga pulong nindot apan wa man gyud tumana" sa tawo. Masulob-on og nawong.

"Imo ra na, sir ha. No comment ko anang imong gisulti" ni Ernie. Ug nilakaw ang tawo. Nisugat sa tawong nagbarong nga mao pay pagsulod sa husgado. Iya tingaleng abogado. Nagpahiyom si Ernie nga nagpanglingo. Ug gipakli niyag balik ang iyang gibasa ganiha. "Unsa man tuoy mahimo sa Judiciary ining problema sa kadaghan sa mga kaso ug kadaghang husgadong way huwes?" nakatuaw siya sa hilom. (Kataposan) (Sa gusto’g libreng konsulta, dad-a ning pahina sa opisina sa tagsulat. Sa Sabado sa buntag)