Tingkulyada

Domingo sa buntag human sa misa, nahibulong si Padre Amboy sa pipila lang kabuok ang nanimba. Lahi sa inaugural mass nga dasok ang mga tawo. Ang giandam nga painit sama sa puto ug bibingka nga pakapinan sa sikwate gilangaw ug nangamig lang sa kabugnaw. Wa matandog ug gilawog na lang sa baboy.

Mao nga human gyud sa misa, misuroy libot tibuok Tangke si Padre Amboy pamasin nga masayran ang hinungdan nganong nagkadiyotay ang mga parokyano nga manimba sa kapiya. Daku ug nindot man unta ang kapilya sa Tangke!”

Sa iyang suroysuroy, nakita ni Padre Amboy sa eskina ang mga babaye ug mga bata nga nagsugal sa tong-its, binggo ug boletse. Nakita sab niya nga nagkamang sa yuta ang mga gagmay’ng mga bata nga nagkamoritsing ang nawong sa buling. Pasagdan lang sa inahan kay tutok sa baraha ang ilang panan-aw!

Didto sab sa unahan, nakita ni Padre Amboy duha ka babaye nagginathanay.

“Ang imo may gulong-gulong. Hala bira bisan kinsa!” Gahut sa babaye nga nanighawak mora’g kahambaton.

“Ang imo sad naay ngoyo-ngoyo. Di dutlan bisan duslitan pa!” Isog nga tubag sa kaatbang nga nangandam pagsukol. Hilum mo diha! Maulaw ta kay naay pari nga namati sa inyong ginathanay.” Badlong ni Kapitana Perla nga nagpaminti sa kalagot. Ug nahilom ang ginathanay. Miduol ang pari sa kapitana nga namula ang nawong sa kapungot.

“Relaks lang. Mao gyud na ang inahan sa balangay!” Matud pa sa pari agi’g paghupay sa kapungot ni Kapitana Perla.

“Bastos kining mga bayhana, Dre!” Tubag ni Kapitana Perla.

“Lain pa’y ato, diyutay na man ang manimba sa kapilya?” Pasiuna ni Padre Amboy ngadto sa kapitana nga namahid sa singot. “Mao na dinhi sa Tangke, Dre. Paabot lang sa kulyada kay manganha lagi ang mga tawo sa kapilya!” Pasalig ni Kapitana Perla kang Padre Amboy.

Ang balangay sa Tangke nahimutang daplin sa dagat ug pangisda ang panginabuhi sa mga tawo samtang mga asawa mao sab ang mamaligya sa ilang kuha. Unya, miabot ang tinghabagat ug nagkanaas sa dagkung balud ang dagat. Kusog sab ang hangin ug medyo naglain ang panahon.

Sayo sa buntag adlaw’ng Domingo, maoy namat-an ni Padre Amboy ang mga inahan nga nagsaguyod sa ilang mga anak. Ang uban didto na sulod sa Kapilya nagpaabot sa pari. Wa mangandam sa naandang tagana ang pari kay lagi natagam sa kadiyutay nang manimba.

“Wa na’y painit, Dre? Gutom kaayo uy!” Hapit magkadungan pagsukna ang mga inahan ngadto sa pari. Nahinumdom sab ang batan-ong pari sa sulti ni Kapitana Perla. “Mao na’y gidangat. Manimba lang panahon sa kulyada!” Ug misulod ang pari kilid sa sakristiya kay mag-ilis aron sugdan ang misa. (Kataposan)