Naghilak nga Bituon

Gula 52

Gibalik ni Jackie pagpiyong ang iyang mga mata. Dili siya buot makakita sa traffic jam kay maghatag lang kini’g kapikal kaniya.

Pag-abot nila sa Glorrietta mao usay paghigmata ni Jackie. Nakatagpilaw gyud siya sa ilang pagbiyahe.

Dihang napahimutang na ni Noy Teryo ang sakyanan sa parking area, mikanaog kini ug giablihan ang pultahan tungod sa gilingkoran ni Jackie.

Mikanaog si Jackie. Unya giablihan niya ang iyang shoulder bag. Nagkuha siya’g tibuok P500 ug gitunol kini ngadto sa driver.

“Paglingawlingaw una,” ni Jackie pa. “Mag-abot lang kita dinhi sa sakyanan unyang hapon, mga five o’clock. Okey?”

“Oo, Ma’am,” sanong ni Noy Teryo dayong lakaw.

Kadali ra kining nahanaw sa panan-aw ni Jackie.

Misulod si Jackie sa Glorrietta. Tungod lagi kay sikat man siya nga artista, daghan ang nakaila kaniya nga mall shoopers. Igo lang siyang mikaway ngadto kanila.

Misulod siya sa usa ka outlet sa Rusty Lopez. Ang mga saleslady nga nakaila dayon kaniya misugat aron pag-entertain kaniya. Apan wala siya’y planong mopalit og sapatos. Hinuon, kun may magustohan gayod siya, iya kining paliton. Total, may kuwarta man siya.

Migawas si Jackie sa outlet sa Rusty Lopez nga walay gibitbit nga pinalit. Bisan pa man, nagpasalamat ang mga tindera sa maong tindahan sa iyang pagsulod sa maong outlet. -- Sumpayan pa