Langob sa estero

"Dili una ta modiritso’g pauli sa atong balay, Bay Oliver! Sama sa naandan, modimdim una tag bahal nga tuba sa tubaan ni Ingko Kadong...!"

"Ayos, Bay Delfin! Magpakundisyon tas atong kaugatan! Maayo kay pyur og tubang baligya si Ingko Kadong...!"

"Inigkahuman nato’g dimdim sa tagduha ka bol nga tuba nato matag usa, dad-on tika, Bay Oliver, sa lain kong suking dapit nga pasamot sa atong kondisyon...!"

"Ha? Suking dapit? Pasamot sa atong kundisyon? May bag-o diay kang suking dapit, Bay Delfin...?" miiknat ang kilay ni Oliver. "Asang dapita, Bay Delfin...?"

"Adto tas usa ka langob sa estero...!"

"L-langob sa estero...?"

"Basta sunod lang nya nako, Bay Oliver! Maglingawlingaw ta sa dili pa moremit sa atong mga sweldo ngadto sa atong mga asawa. Adto tas langob sa estero...!"

"Aw, agad lang ko nimo, Bay Delfin...!"

Managsilingan sila si Delfin ug Oliver sa eskuwater nga dapit sa Barangay Camputhaw sa siyudad sa Sugbo. Parehas sila nga mga pahinante sa usa ka dakong konstruksiyon sa commercial building nga gitukod sa kinapusorang dapit sa siyudad. Mao kini ang matang sa panginabuhian nga ilang gibuhi sa mga asawa ug mga anak.

Human makainom og tag-duha ka bol nga tuba matag usa kanila, gidala dayon ni Delfin si Oliver sa giingon niyang suking langob sa estero. Misulod sila sa eskinitang dalan ug milabang sa usa ka tulay nga nagdugtong sa estero. Miiknat ang kilay ni Oliver dihang misulod si Delfin sa usa ka balay, human gisugat niadtong upaw nga lalake. Sa sulod, nasiklapan ni Oliver nga linga kaayo ang mga lalake nga nagpulipuli og hingos niadtong butang nga ilang gipaasohan.

"Bay Delfin! Unsa man na sa sulod nga nagsige man og hithit ang mga lalake...?"

"Mao ni ang giingong kong langob, Bay Oliver! Mao ni ang langob sa estero nga hithitanan og shabu! Katingan god nato ang atong sweldo nga iremit sa atong asawa! Mohingos ta, Bay, aron pakundisyon...!"

"Sus, sige na diay kag sulod ning maong langob, Bay Delfin...!" nagpanglingo si Oliver nga miatras. "Mouna na lang kog pauli, Bay! Dili ko mosulod ning maong langob sa estero...!" hugot nga mibalibad si Oliver sa agni-tental kaniya ni Delfin.

"Aw, di tika pugson, Bay Oliver! Ayaw bayag sultihi si Misis nga ania kos langob sa estero, ha..?"

Nagpanglingo si Oliver nga dali kaayong nakabiya sa maong dapit aron mopauli sa ilang balay.

Pagkaugma, maoy nabalitaan ni Oliver gikan sa naghilak nga asawa ni Delfin nga gironda sa kapolisan ang usa ka dapit sa estero. Ug naapil si Delfin sa pagkasikop uban sa mga lalake nga naaktohang naghithit og shabu. Igo lang nakahangad si Delfin ug hinay'ng mikibot ang baba.

"Ginoo, salamat nga gilikay mo ako sa tentasyon...!" (Kataposan)