Naghilak nga Bituon

Gula 50

Hangtod karon nangandoy gihapon ang iyang kasingkasing kang Ethan. Tinuod nga inanay na niyang nahikalimtan si Ethan. Apan may mga higayon gayod nga dili siya makalikay sa paghandom niini ilabi na sa mga panahon sa iyang pag-inusara.

Mao kini ang hinungdan nga gusto siyang busy kanunay sa trabaho. Gusto niya nga pinaagi sa paghikutar sa daghang mga buluhaton nga may kalabotan sa iyang career hingpit na niyang mahikalimtan si Ethan.

Adlaw’ng Domingo. Gikan sa townhouse nga iyang gipuy-an sa Laguna, malinawon nga nagsubay ang Expidition ni Jackie nga gimaneho ni Noy Teryo sa South Superhighway. Padulong sila sa Glorrietta sa Makati.

Taliwala sa ka-hectic sa schedule ni Jackie, nangita gayod siya’g paagi nga makarelaks. Nag-advance siya’g taping sa teleserye nila ni Jerome ug nangayo siya’g excuse nga dili una mo-guest sa Sunday variety show sa UBS-CVN.

Samtang nagpadayon pagdagan ang sakyanan, nagpatugtog si Noy Teryo sa stereo sa sakyanan. Gilingaw ni Jackie ang iyang kaugalingon sa pagpamati sa matahom nga mga awit nga gipatugtog sa Hot FM. Usa sa gipatugtog mao ang hit kaayong kanta mismo ni Jackie ug nahimuot siyang nagpamati niini. -- Sumpayan pa