Gula 47
Paglabay sa usa ka semana gitak-opan ang Pilipino Film Festival. Pagkagabii, gipahigayon ang awards night.
Nahitabo ang wala damha ni Jackie. Siya ang nakadaog pagka best actress. Si Jerome usab ang best actor. Ang ilang pelikula mao usab ang nahimong best film of the year.
Daghan pa og tropeyo nga nahakot ang pelikula nila ni Jackie ug Jerome. Kini ang top grosser sa walo ka entries sa filmfest. Nakuha sa maong pelikula ang tropeyo isip best edited film, best in cinematography, best in musical direction ug ang ilang direktor nga si Direk Wenn Ramos maoy gipasidunggan isip best director.
Malipayon kaayo ang tanan nga naglangkob sa production sa maong pelikula, gikan sa casts, mga tawo nga maoy nagmaniobra sa luyo sa kamera ug lakip ang labing ubos nga mga kaabag sa paggaling sa maong pelikula.
Naghimo og dakong selebrasyon ang Ore Films nga maoy naggaling sa “My Special Valentine.” Gisaulog nila ang kalamposan sa maong pelikula sa paghakot og daghang award sa Pilipino Film Festival.
“Nalipay ko nga ikaw ang nakadaog pagka best actress,” nagkanayon si Joy Lorenzo sa dihang nagkasulti sila si Jackie human sa bonggang selebrasyon sa Ore Films. “At least, imo nang napamatud-an nga dili ka lang usa ka ordinaryong aktres.” -- Sumpayan pa