Naghilak nga Bituon

Gula 46

Human sa promotional tour sa ilang pelikula sa nagkadaiyang mall sa Manila, miadto sila sa Kabisay-an ug Mindanao aron i-promote usab didto ang ilang pelikula. Mibisita sila sa Iloilo, Cebu, Cagayan de Oro ug Davao aron pagpakighimamat sa ilang mga fans.

Ilang gihangyo sa publiko ang paghatag og tiningob nga suporta sa ilang pelikula aron kini mokita og dako sa takilya.

Miabot ang adlaw sa pormal nga pagbukas sa Pilipino Film Festival. Walo lamang ka pelikula ang mi-qualify isip official entries sa filmfest ug usa na niini ang pelikula nila ni Jackie ug Jerome nga nagdala sa ulohan nga “My Special Valentine.”

Ang pelikula nila ni Jerome ug Jackie maoy usa sa labing lig-on nga entry sa filmfest. Gihugonhugon ug gipaabot nga ang maong pelikula maoy mohakot og labing daghang mga pasidungog sa festival.

Sa takilya, ang pelikula nila ni Jackie ug Jerome maoy labing gipilahan. Nagtinagsok sa sulod sa mga sinehan ang mga manan-away. Gidugok pag-ayo sa mga makisine ang maong pelikula. Miepekto gyud ang paghimo nila’g promotional tour sa kaulohan ug sa kaprobinsiyahan.

Sa unang adlaw sa pagsalida sa mga pelikulang gisalmot sa filmfest, ang “My Special Valentine” maoy migawas nga labing dako’g kita. Malipayon kaayo ang direktor sa pelikula ug ang manager nila ni Jackie ug Jerome. Siyempre, nalipay pud ang duha ka magka-loveteam tungod kay giisip nilang dakong achievement sa ilang career ang kalamposan sa maong pelikula. -- Sumpayan pa