Bawion ko ang imong gugma

Gula 87

“Maayo nang kaduha kay di bungkig.”

“Hanggaw.”

Ug ang misunod nga mga gutlo giharian na sa ilang mga hangos ug agulo. Sa sangi nga handurawan ni Annie nililas ang pasundayag sa anay sa ilang silingan nga gipaliwatan.

Pagkasunod semana. Nangatubang na si Edelmar sa mga ginikanan ni Annie. Kuyog sa ulitawo ang mga ginikanan niini. Gisabotan sa masig nila ka ginikanan ang bahin sa ilang kasal. Ug gitakda dayon ang petsa.

Unya nianang bisperas sa kasal nilang Edelmar ug Annie nahitungha si Melvin sa pinuy-anan sa dalaga. Labihang kuganga ni Annie.

Nabalaka si Annie sa pagpakita ni Melvin kaniya. Nahadlok siyang magmugna kini’g kasamok atol sa kasal nila ni Edelmar.

“Nganong nia ka?” Gipangutana ni Annie si Melvin.

“May mahinungdanon kong tuyo nimo,” laktod nga tubag ni Melvin.

“U-unsa kana?”

“Nia ko aron pag-invite nimo.”

“Sa unsang okasyon?”

“Kaslon ko sa sunod semana. Gusto unta kong motambong ka.”

“Kana lang diay? Sure.”

“Salamat.”

“Congratulations sa umaabot mong kasal.”

“Mo-congrats sab ko nimo. Ugma na man diay ang kasal ninyo ni Edelmar.”

Samtang nagpadayon sila sa ilang panagsulti. Miduol si Edelmar kanila. Gipaila ni Annie si Melvin ngadto sa iyang pamanhonon. Naglamanohay sila si Edelmar ug Melvin. Gi-invite usab ni Edelmar si Melvin pagtambong sa kasal nila ni Annie.

Pagka ugma, mibagting ang lingganay sa simbahan sa Guadalupe. Naghuot ang katawhan sulod sa simbahan kay daghan ang mitambong sa kasal nila ni Edelmar ug Annie. -- Kataposan