Gula 41
Wala’y laing gihimo si Jackie gawas sa pagpalambo sa iyang showbiz career. Ang lain niyang gika-busyhan mao ang pelikula nga iyang gigama ubos sa Ore Films diin si Jerome Celesta gihapon ang iyang leading man. Mao kini ang biggest movie so far nga iyang gihimo sa iyang career.
Dako kaayo’g budget ang maong pelikula ug bug-at usab ang casting niini tungod kay isalmot kini sa Ore Films sa Pilipino Film Festival nga ipahigayon matag tuig.
Aron pagseguro nga makuha ang patronage sa mga makisine sa pelikula nga gihimo nila ni Jackie ug Jerome, nakahunahuna ang ilang manager nga si Joy Lorenzo og laing paukyab.
“Atong ipatuo sa publiko nga kaslonon na kamo ni Jerome,” nagkanayon si Joy Lorenzo.
“W-wala na bay laing paagi gawas niana?” Sukit ni Jackie nga wala makagusto sa ideya sa iyang manager.
“Mahimong makahunahuna pa kita’g laing paagi gawas niini. Pero this is the best way so far.”
“Pananglit mosalir ang maong paukyab, unsa na man usab ang sunod nga gimik nga atong himuon aron dili mabawo ang mga tawo nga magpaabot kun kanus-a mahinayon ang among kasal?”
“Unya na kita maghunahuna’g paagi kun unsaon nato paglusot kun moabot na kanang higayona. Ang importante mao nga mosamot ang kahumot sa inyong loveteam karon aron mahimong blockbuster ang inyong pelikula. -- Sumpayan pa