Bawion ko ang imong gugma

Gula 85

“Edelmar...!”

“Annie...!”

Migakos si Annie kang Edelmar. Gigakos usab siya sa ulitawo.

“Gipakaingon ko’g milarga ka na paingon sa London,” ni Annie pa.

“Molarga na gyud bitaw unta ko,” matud ni Edelmar. “Didto na ko sa Manila. Pero nakahukom kong mobalik dinhi sa Sugbo. Di ko makahimo sa pagbiya kanimo sa ikatulong higayon. Karon, di na gyud kita magkalagyo.”

Nahinangop pag-ayo si Annie sa gisulti ni Edelmar. Nahagakos na usab siya sa ulitawo.

“Nahinumdom ka ba sa atong gibuhat sa wala ka pa manamilit nako dayon nimong larga paingon sa London?” Sukit ni Annie dihang didto na sila sa sala sa ilang balay.

“Kadtong nahitabo nato sa hotel?” Ni Edelmar.

“Oo. Nasayod ka ba kun nganong gitugyan ko kanimo ang akong pagka babaye niadtong higayona?

“Of course, tungod sa gugma mo kanako.”

“Dili kay kana ra.”

“Unsa pa man diay?

“Tungod kay dako ang akong pagsalig nga kita gyud ang magkadayon. Magkinaunsa man ang kalibotan, nasayod kong magmadaogon ang atong gugma.”

Ang misunod nga mga gutlo giharian sa kahilom. Nag-inukobay ang mga ngabil nila ni Annie ug Edelmar kansang mga dila daw nagtigi pagsupsop sa dugos sa gugma. -- Sumpayan pa