Magpaabot ako kanimo

Dili maayo managat karon, Carding, matud ni Saysay ang asawa ni Carding. "Matud sa Pag-asa nga dunay umaabot nga bagyo." "Sagdi lang, Say kay dili man ako magdugay sa lawod," tubag ni Carding ngadto sa asawa. "Duna lang ako’y pandawon kadtong akong gitaan nga bubo."

"Busa, nagpadayon gayod si Carding sa paglutaw taliwala sa pasidaan ni Saysay. Ang hinungdan man god sa pagpaningkamot ni Carding tungod sa tinguha nga makatigom siya’g kuwarta aron makasal sila ni Saysay.

Wala man god makagusto kaniya ang iyang ugangan tungod sa pagtuo nga siya dili angay kanila tungod kay siya kaliwat lang sa usa ka mananagat ug unsa man kuno ang iyang ibuhi kang Saysay? Mao nga buot dublehon ni Carding ang paningkamot basin pinaagi niini, mawagtang ang pagpakamenos kaniya sa iyang ugangan.

Lain pang hinungdan nganong dili gayod ni Carding gusto nga mausikan ang iyang panahon, mao ang tinguha nilang magpakasal unta sila nga dili na mosango sa mga ginikanan. Busa, mao kini si Carding nga bisan kun dunay taliabot nga daotang panahon, miadto gayod siya sa dagat.

Ug sa pag-abot ni Carding sa lawod ug igo lang siyang nakapaluna, namatikdan niyang misamot ang katugnaw sa huros sa hangin. Ning tungora, morag gibati og kakulba si Carding ilabi na nga nag-inusara lang siya. Wala siya’y masangpit nga tawo.

Ug sa kalit lang, mihapak ang dakong balod hinungdan nga maayong pagkakulob sa sakayan ni Carding. Misinggit og tabang si Carding apan ang iyang tingog igo lang gilamoy sa makusog nga huros sa hangin sa lawod.

Nagbuntag ang pagdaot sa panahon. Diha sa mga ala-una ang takna sa buntag, gibuksan ni Saysay ang iyang radyo aron pagsuta kun asang dapita ang bagyo.

Pinaagi sa radyo nasayran ni Saysay nga ang bagyo sulod ra sa ilang probinsiya ug ang dapit diin mangisda si Carding lakip kini nga dapit.

Sa hinayhinay, wala kapungi ni Saysay ang paghilak. Bag-o pa silang nag-ipon og puyo si Carding ug sakit kaayo kun mawala kini sa iyang kinabuhi. Gipalabi niya si Carding labaw niadtong mga lalaki nga nangulitawo kaniya, unya sa takulahaw mawala lang kini kaniya?

Bisan gani ang iyang mga ginikanan wala gayod makapugong taliwala sa ilang pagdili. Unya mawala lang si Carding kaniya?

Nanglabay ang mga adlaw sa sanga sa panahon, apan wala na gayod mobalik si Carding. Mitambag ang mga higala ni Saysay nga dawaton na lang niya ang kamatuoran nga ingon gayod niana ang kinabuhi. Naay mga panahon nga ingon sa pagahikit-an niya si Carding nga magbugsay paingon kaniya diha sa baybayon, apan kining tanan taman lang sa paghanduraw. Maayo unta kadto kun namunga ang ilang kadiyot nga pag-uban aron duna siya’y mahimong handumanan gikan kang Carding.

Apan, sa matag karon ug unya, matag dalikyat niya sa baybayon, dili niya kapugngan ang pagtu-aw, "Carding paabuton ko ikaw sa imong pagbalik." (Kataposan)