Bawion ko ang imong gugma

Gula 83

“Husto ka. Ako kanang gipapintal sa labing maayong pintor didto sa London. Oil painting kana. Dako ko’g nagasto sa pagpapintal niana.”

“Imo ba kong pabayron sa imong nagasto nianang maong pinintal?”

“Dili uy. Gipakita ko lang kana kanimo aron pagmatuod nga bisan wa na koy suwat-suwat nimo sa didto pa ko sa London pero wa ko ikaw hikalimti.”

Wala motingog si Annie. Pero gumikan kay flattered siya sa gisulti ni Edelmar, gigakos niya ang lalaki.

“Abi mo,” ni Annie pa nga milugak paggakos ni Edelmar. “Sa dihang wa ka na mosuwat nako ug wa ka na sab mo-text, nagtuo ko nga kamo na gyud ni Melinda.”

“Nangabubho ka gyud diay kang Melinda?” Nahikatawa si Edelmar.

“Siyempre. Hitsuraan man sab gud tong babayhana.”

“Managhigala lang kami ni Melinda. Gawas pa, minyo na siya. Usa ka Briton ang iyang nabana.”

Nagtuo si Annie nga dili na gayod magkalagyo pa pag-usab sila si Edelmar. Apan usa ka adlaw niana, mitungha si Edelmar sa ilang pinuy-anan nga nagdala sa, alang kaniya, usa ka daotan nga balita.

“Mo-abroad ka na sab?” Sukit ni Annie nga nakugang.

“Kataposan na lang ni nakong pag-abroad, An,” ni Edelmar. “Anugon man gud ang opportunity.”

“Di ko mosugot.”

“Pero, An, alang ra kini sa atong kaayohan.”

“Basta kay di ko mosugot. Di na ko makatugot nga magkalagyo na usab kita pag-usab.” -- Sumpayan pa