Ang tabanog ni Tarius

Asa imong papa'g mama, apo, ko! matud ni Lolo Tinlo. Gikan siya sa abuhan, giduol niya iyang apo. Tua sa atong basakan, Lo. ni Tarius, nga nagtugot sa hilo sa iyang tabanog nga gipatugpo niyang Dong Sagi.

"Lagi, kabawo ko. Di ba giingnan man tika nga tawga,kay maniudto na ta." Matud ni lolo Tinlo, nga nagkauling ang ilong ug siko. Bag-ohay lang siyang nahuman og digamo para sa ilang paniudto. Bugas mais, utan kamunggay sinagola’g knorr chicken cubes, minantikaang ginamos ug buwad sinugba, ang iyang giluto.

"Wa nalang nako disturboha, Lo, uy. Kay nagtabanog man gud silang duha, pag-abot nako," ni Dong Tarius, nga naghuwat sa tyempo sa hangin aron paluparon ang iyang tabanog.

"Unsay nagtabanog?" Nasinta iyang lolo "Kadagko na nilang ul-ol!"

"A, basta, Lo. Adtoa lang didto, aron ka motuo," pung ni Dong Tarius. "Buhii nang tabanog, Bay, Sagi! kay kusog nang hangin! itulbong pagtugpo, ha! kana!" ug gibira ni Dong Tarius, ang tugot sa iyang tabanog. Pwerte niyang lipaya sa katulin sa niluparan sa iyang tabanog. Unya pa kunong alas 5:58 sa hapon niya palandingon ang iyang tabanog. Sabado bitaw kuno ron, way klase hangtud ugma, Domingo.

Gitan-aw ni lolo Tinlo, ang dapit sa ilang basakan kun nabay tabanog nga naglupad apan wa siyay nakita. Gibinuangan lang tingali kuno siya sa iyang apo. Ang tinuod wa kini moadto sa basakan tungod sa katapulan. Busa, naghinay-hinay nalang siya’g lakaw padung sa basakan aron adtoon ang mga ginikanan sa iyang apo.

Mao na lay naabtan ni lolo Tinlo, nga naghangos sud sa payag nga wa kasirad-i ang pultahan, ang mga ginikanan sa iyang apo. Nagkadusingot ang mga lawas nga way sapot nga nag-akob. Natumban pa niya ang mga sinina sa duha nga diha sa ubos sa usa ra ka ang-ang nga hagdan nga diriyot makalukapa kaniya.

"Peste!" ni lolo Tinlo, pa nga nagngisi. Ug mibalik lakaw pauli.

"Nagtabanog silang papa'g mama, lo, sa!" ni Dong Tarius, nga nagpungko sa punoan sa landong sa lubi, samtang nagbira-bira sa tugot sa iyang tabanog.

"Nagtabanog sa imong kagaral! nga nag ... kuan .... man lagi to sila?" Panglingo ni lolo Tinlo.

"Nagtabanog, lagi!" insister ni Dong Tarius nga nagngisi.

"Nganong nagtabanog man kunoy tawag nimo, adto, bi?"

"Wa diay ka, kasabot sa akong pasumbingay, lo? Enenglisa ang tabanog, ipabilin ang nag-..." matud ni Dong Tarius, nga 10 anyos.

Naghuna-huna si Lolo Tinlo. Nagkawot-kawot sa opaw niyang ulo. Ug unya kalit lang mingisi. Nakita ang mga pangag niini.

"Tinuod sa ... nag-kite!" (Kataposan)