Bawion ko ang imong gugma

Gula 81

Wala gihapon motingog si Annie. Alang kaniya, sayon ra unta kaayong tubagon ang pangutana ni Edelmar. Pero dihay pagduhaduha nga  mihawid sa iyang hunahuna pagtubag sa maong pangutana.

“Kun maglisod ka pagtubag sa maong pangutana,” gikan na usab ni Edelmar, “di ta ka pugson. Apan kini lang maoy timan-i. Gimahal tikaw. Sukad pa kaniadto, hangtod karon ug sa umaabot, walay makapuli sa imong dapit sa akong kasingkasing. Karon nga nasayod ka na sa tinuod, anaa na kanimo ang paghukom.”

Mihinay pagtindog si Edelmar. Unya milakaw kini paingon sa pultahan.

“K-kadiyot lang, Ed,” gisangpit ni Annie si Edelmar dihang hapit na kini makagawas sa pultahan.

“Nga-ngano?” Milingi ang ulitawo kaniya.

“Mohinayon ka gani’g kanaog karon,” ni Annie pa, “di ka na gyud makakita nako hangtod sa hangtod.”

Si Edelmar ingon sa nakasabot dayon sa kahulogan sa iyang gisulti. Dihadiha mibalik kini sa iyang nahimutangan ug gigakos siya. Naghilak si Annie nga migakos usab kang Edelmar. Kadto igo nang timailhan nga nagkatakdo na pagbalik ang ilang mga kabubut-on ug pagbati.”

“I’m sorry, Melvin,” matud ni Annie usa ka gabii niana nga namisita si Melvin kaniya.

Gitug-anan na niya ang ulitawo nga nagkauli na sila si Edelmar.

“Okey lang, An,” ni Melvin nga masulob-on kaayo ang panagway. “Nakasabot ko. Ingon gayod tingali niini ang kinabuhi. May kasingkaisng magdugo luyo sa kalipay sa uban. -- Sumpayan pa