Ang tigpatanto nga way kalooy

Dugay na sa negosyong tigpatanto si Sidra sa ilang dapit diin daghan gayud ang mangutang bisan og tagaliog ang interest sa salapi nga gihulam.

Kaniadto kay diha paman to ang Usury Law, pinasubay ra gyod sa balaod ang tanto kon tubo sa kuwarta nga iyang ipahulam.

Apan karon, giwagtang na ang nahisgotang balaod nagpatuyang nalang si Sidra sa iyang gibati. Bisan og nagkalisudlisod ang kustomer sa iyang kahimtang, dili kini igsapayan ni Sidra. Ang importante kaniya mao nga mokita og daku pinaagi sa interest ang iyang kuwarta. Ang iyang mga kahigalaan ug mga paryente dili makalingkawas sa dagkung patong nga ipahamtang ni Sidra ngadto kanila.

Usa ka adlaw niana, miduol kaniya si Biana nga ilang silingan.

"Day Sidra dia lagi ko kay naospital si Dadoy nga akong bana kay nadunggaban siya sa iyang kainom kagabii sa tubaan ni Uray Kolasa."

"Fifty-fifty kon lisod ang kahimtang niya karon. Ingon sa doktor nga abunohanan siya og dugong type AB," dugang pa ni Biana nga ang tingog nagdala og pakilooy.

"Sayon ra kana Biana. Makapahulam ko nimo og singkwenta mil basta ang titulo sa inyong yuta nga giuma karon ihatag mo kanako ug akoy tipig niana samtang dili pa mabayran ang inyong hulam." Pintok nga tubag ni Sidra.

Pilay estorya, nakahulam gyud si Biana apan nahiktan usab ang titulo sa ilang yuta. Ingon ani ka segurista si Sidra. Kay mahal man lagi karon ang mga tambal, nadugangan gyud ang hulam ni Biana hangtud nga naembargo ang yuta nila sa kaulahian.

Dili lang kini, ang mga maestra ug empleyado wa makalingkawas sa pagpananto kang Sidra. Usa ka maestra nga si Ma'am Lany ang misulay og hangyo kang Sidra, "Mohangyo unta ko nga sa sunod nalang ko mobayad kay emergency kaayo namatay ang akong Nanay sa atake sa kasingkasing," hangyo nga nagdala og pakilooy ang tingog sa maestra.

"Dili mahimo! Kun unsay gikasabutan kinahanglan gyong tumanon!" tubag ni Sidra nga pinagahi ang tuno sa iyang tingog.

Unsa mang hitaboa nga mopauli na unta si Sidra, gibabagan man ang iyang gisakyan sa usa ka itom nga motorsiklo nga adunay angkas kon backrider sa likod.

Gi hold-up siya. Gihimulbolan. Gidala ang iyang bag nga ang sulod pulos salapi ug mga papeles sa yuta nga gigarantiya kaniya.

Dili lang kini, nasunog usab ang iyang balay kay mibuto ang LPG nga maoy sinugdanan sa kayo.

Naminghoy ang nawong ni Sidra. Dako siya’g perdisyon ning hitaboa. Busa, kinahanglan nga kitang tawo dinhi sa kalibutan dili magpalabi sa atong isigkaingon. Pantay-pantay lang kay lumalabay lang kita sa madugay ug sa madali. Bisan og gamay lag ganansiya sige lang basta kanunay. (Katapusan)