Naghilak nga Bituon

Gula 36

“Dili kana mao ang akong punto. Nagkinahanglan ko sa imong moral support. Mao kanay hinungdan kun nganong gusto kong motambong ka gyud sa akong mga pasundayag.”

“Kataw-anan kaayo, Jackie. Ikaw nga usa ka sikat nga artista nagkinahanglan sa moral support sa sama nako nga usa ka ultimo sa katilingban?”

Si Jackie na usab ang wala makatingog. Naglisod siya sa pagpasabot kang Ethan. Dili mahimong tug-anan niya si Ethan sa matuod nga gimahal niya kini mao nga nagkinahanglan siya sa moral support niini.

Unsaon niya pagpasabot si Ethan nga bisan taas siya’g ambisyon sa kinabuhi apan simple lang kaayo ang standard niya mahitungod sa iyang ideal man? Hard to get ba si Ethan o manhid lang gayod kini mao nga wala gayod kini makasabot sa gipakita niyang gesture nga dako siya’g gusto ngadto niini?

“Nagkinahanglan ka gyud kaha sa akong moral support?” Sikmat ni Ethan. “O gusto kang motambong ko sa imong mga pasundayag aron duna kay himuon nga kiko-kiko?”

“W-wala ko ikaw hisabti?” Nahitutok si Jackie kang Ethan.

“Gipakauwawan ko nimo sa akong pagtambong sa imong konsiyerto didto sa Cebu Coliseum. Ang imong pagdala nako ngadto sa stage maoy usa ka dakong pakauwaw nga imong gitamparos sa akong pagkatawo.”

“Usa kadto ka social affair, Ethan. Wala ko maghimo’g binastos. Gihimo kokadto agi’g paukyab aron malingaw pag-ayo ang mga tawo.” -- Sumpayan pa