Bawion ko ang imong gugma

Gula 79

Wala kaayo makatugkad si Annie sa gipamulong ni Melvin. Alang kaniya, lahi og tuno ang sinultihan sa ulitawo. Bug-at kini’g kahulogan.

“U-unsay buot mong ipasabot, Melvin?” Nagpakitubod si Annie kay buot niyang klarohon ang tanan.

“Karon nga mibalik na si Edelmar,” ni Melvin pa, “andam kong mo-give way.”

“Unsa gud kanang gipanulti mo?”

“Niadtong gabii nga gihatod ko ikaw dinhi gikan kitang nanuroy, wa ko modiretso’g pauli.”

“U-unsa?”

“Lawom na man gong gabii kitang namauli. Nabalaka ko nga tingali og kasab-an ka sa imong mga ginikanan. Mao nga naniid ko sa inyo. Pero ang inyong panagsulti ni Edelmar ang ako nga nadungog.”

Wala makatingog si Annie. Mora’g napihaw siya sa gisulti ni Melvin kaniya.

“Gihigugma ko ikaw, An,” gikan usab ni Melvin. “Kun asa ka magmalipayon, suportahan tikaw. Ulahi lang kong miabot sa imong kinabuhi kay kang Edelmar. Karon, kinahanglang honest ka sa imong kaugalingon aron imong masayran kun kinsa namong duha ni Edelmar ang mas bug-at sa imong kasingkasing. Kun si Edelmar ang imong pilion, andam kong modawat sa akong kapakyasan.”

“M-Melvin....?”

“Si Edelmar maoy orihinal nga tag-iya sa imong kasingkasing, An. Busa kun adto ka magmalipayon uban niya, pwes, iuli ko ikaw kaniya. Ingon niana ang matuod nga gugma, An, andam magsakripisyo. Letting go is just another way to say I’ll always love you.” -- Sumpayan pa