Dili intawon binayran ang akong kasingkasing

Dili lang tingali makaduha o makaupat ka higayon nga naitlib ko ang akong ngabil samtang nag-atubang ko sa dakong salamin aron sa pag-areglar sa akong kaugalingon inabagan sa suod ko kaayong higala nga si Sheila Mae, nga usa ka beautician.

Gisakitan man gud kaayo ko sa gipangteks kanako ni Junie, ang kanhi kong uyab nga kababata ko ra usab ug nahimo ko pa ganing klasmet gikan pa sa elementarya hangtod na sa hayiskol.

Grabe man gud kaayo ang iyang gipangteks kanako. Gawas nga gimahayan ko niya, iya pa usab akong gibasol. Gipakamenos pa gani niya ang akong pagkababaye. Ug ginganlan pa ko niya’g dili mao. Ug giingnan nga nawong kuno ko’g kuwarta. Kay misugot lang kuno ko nga makigminyo og usa ka biyudo ug edaran pa gayud tungod lang kay kuwartahan kini. Nagtuo tingali siya nga kuwarta lang ang akong giapas maong makigminyo ako kang Adolfo.

Hinuon, dili kaayo ko makabasol kun nganong nakaingon siya niadto. Misabot lang ako nga nabuhat niya kadto tungod sa iyang dakong kahiubos kanako. Kay inay adto ako makigminyo kaniya adto na hinuon ko makigminyo sa lain. Kang Adolfo nga usa ka biyudo ug edaran pa gayud.

Apan, bisan kun misabot ako kaniya gisakitan gihapon ko sa iyang gibuhat. Sa pagngalan niya kanako’g dili mao. Ug sa tanan niyang gipasangil ngari kanako. Kay wa man gyu’y kamatuoran kadtong tanan. Kadtong gipangteks niya kanako. Kay sa tinuoray lang ug anaa ang Dios sa langit siya pa gihapon ang akong gihigugma’g gimahal.

Kun makigminyo man ako kang Adolfo, dili tungod sa gugma. Ug labaw pa nga dili tungod sa sapi. Ug dili intawon mahimong ibaligya ang akong kasingkasing. Kay gikatugyan ko na kini ngadto sa tawo nga tinuoray kong gimahal. Sa tawo nga giisip kong maoy una ug katapusan kong gugma.

Sa tinuod lang nakumpormiso lang gayud ako. Ug dili ako makatugot nga ipagan ko ang ubang tawo sa kumpormisong akong nasudlan. Kinahanglan nga ako ra usab maoy mosulbad niining tanan. Bahala na lang kun unsay akong dangatan sa paglabay unya sa mga katuigan.

Ug samtang nagsige ako’g tutok sa larawan diha sa salamin, mora’g dunay laing larawan nga akong paghikit-an. Usa ka larawan sa tawo nga maoy nakapasurok pag-ayo sa akong dugo, ilabi na kay nanumbalik man sa akong panumdoman ang usa ka panghitabo nga dili ko gayud mahimong hikalimtan.

Wala pa gayud ako malimot nga usa ka gabii niana samtang ako nahinanok pag-ayo diha sa kuwarto nga maoy nahimo kong higdaanan, kalit lang ako nga nahigmata sa dihang akong namatngunan, may lain nang binuhat nga mipatong sa akong lawas ug mipahimulos sa akong kahuyang. Ug mibuong sa akong kadungganan.

Ug nahikurat lang ako kay ang miamong-among diay kanako mao man ang akong agawon nga biyudo. Wala man gud ko magdahom nga makahimo siya niadto kay maayo man kaayo siya kanako. Gani sa tanan namong mga katabang, kay tulo man kaming nanag-alagad kaniya,                    ako maoy gihimo niyang piniyalan.

Kay wala naman ko’y lain nga kapilian, kay mipasalig man usab ang akong agawon nga mangasawa gayud siya kanako, maong miuyon lang usab ako bisan tuod kun sakit kaayo sa akong kahiladman. Kay dili usab ako gustong madahig sa kauwawan ang akong mga ginikanan ug mga igsuon.

Ug labaw pa nga dili ako makatugot nga si Junie unya maoy makaangkon sa mahimong bunga sa linuog nga binuhatan sa akong agawon. Balikon ko sa pag-ingon nga kun magpakasal man ko kang Adolfo, kana dili tungod sa gugma ug labaw dili tungod sa salapi. Kay sa giingon ko na, dili intawon baligya ang akong kasingkasing. (Kataposan)