Naghilak nga Bituon - Gula 33

Nagsunod-sunod ang debuynas sa career ni Jackie kay ang pelikula nga gibidahan nila ni Jerome Celesta nga gipasundayag duha ka semana human sa iyang concert sa Cebu nahimo man usab nga blockbuster sa takilya.

Taas usab kaayo ang nakuhang ratings sa teleserye nga ilang gibidahan sa UBS-CVN. Mibalik gayod ang kahumot sa loveteam nila ni Jerome gumikan sa gihimo nilang gimik atubangan sa media diin ilang gipatuo nga may relasyon sila sa tinuod nga kinabuhi bisan paukyab lang kini nga mugna sa ilang manager. Wala gyu’y nagtuo nga scripted ang maong relasyon.

Lakip ang latest album ni Jackie nga gi-release sa RGB Records gikuninitan usab sa iyang mga followers. Usa kini sa most requested songs sa mga FM Stations, dili lang sa kaulohan kundili lakip na sa Kabisay-an ug Mindanao.

Nahigalam sa kalamposan sa una niyang pasundayag sa Sugbo, si Joy Lorenzo naningkamot nga makakuha og laing booking sa dakbayan sa Sugbo. Tuod man wala mapakyas ang iyang manager.

Paglabay sa tulo ka buwan sa malamposon niyang konsiyerto sa Cebu Coliseum, mibalik siya sa Sugbo alang sa iyang ikaduhang pasundayag nga gipahigayon sa Waterfront Hotel.

Malampuson gihapon ang maong pasundayag. Mao nga gisundan pa kini sa lain pa gyud nga mga pasundayag nga gipahigayon sa Ayala Center, SM City Cebu ug sa Cebu City Sports Complex. -- Sumpayan pa