Naghilak nga Bituon

Misibaw ang pagakpak ug siyagit sa pag-abiba sa mga tumatan-aw sa dihang nahuman ang ilang pagkanta.

Apan si Jackie nag-emote. Ingon sa naanod siya sa karomantiko sa higayon. Wala siya makapugong sa iyang kaugalingon, gigakos niya si Ethan. Wala gani siya makabantay nga may mga luha nang midagayday sa iyang kaapingan.

Misamot pagsuliyaw ang mga tawo nga nakakita sa paggakos ni Jackie kang Ethan. Apan si Ethan wala makalihok. Ingon kini sa nakalitan sa paggakos ni Jackie. Wala mobalos ang ulitawo paggakos kaniya, ingon sa mibati’g kabakikaw.

Nalipay si Jackie sa nahitabo. Wala siya magdahom nga mopasagnunot kini sa gihimo niyang paukyab. Apan nahitabo ang wala niya paabota. Ug kini gikalipay niya pag-ayo. Kalipay nga dili niya ikahubit sa pulong.

Dihang nahibalik na sa normal ang gibati ni Jackie, milugak siya sa paggakos kang Ethan. Mopasalamat pa unta siya kang Ethan apan milakaw na kini. Mikanaog ang ulitawo sa stage nga nagbilin og hait nga tinan-awan kaniya.

Naghatod og kakulba ang maong tinan-awan sa dughan ni Jackie. Kakulba nga nagpasiugda og kabalaka.

Miani og dakong kalamposan ang unang solo concert ni Jackie nga gipahigayon sa dakbayan sa Sugbo. Mikita og dako ang maong pasundayag tungod kay nahurot man og kahalin ang tanang mga ticket. -- Sumpayan pa