Bawion ko ang imong gugma

Gula 75

“Maayo kay nia ka na, An,” ni Edelmar pa. “Kaganina ra kong nagpaabot nimo.”

“Nganong nia ka pa sa amoa niining orasa sa kagabhion?” May kagahi ang tingog ni Annie.

Gipaningkamotan sa dalaga nga mamatikdan ni Edelmar ang uga niyang tinagdan niini. Gusto niyang masabtan sa ulitawo nga nasuko siya ngadto niini.

“I-ikaw ang akong gihuwat, An,” matud ni Edelmar.

“Ug nganong naghuwat ka man nako?” Sikmat ni Annie. “Unsa bay labot mo sa akong kinabuhi?”

“Gusto kong magkasulti ta, An. Daghan ko’g angay nga ipasabot nimo. Daghan ka’g angay masayran gikan kanako.”

Naghinuktok si Annie sa gisulti ni Edelmar.

Misantop sa hunahuna ni Annie nga kun molikay siya sa pagpakigsulti kang Edelmar seguradong dili gayod kini mohunong pagsamok kaniya. Tingalig masantop lang hinuon sa kasamok kun magpadayon siya sa paglikaylikay sa kanhing hinigugma. Mao nga mihukom siya nga pakigsultihan si Edelmar aron matapos na ang tanan tali kanila.

“Unsay gusto mo nga atong panagsultihan?” Gisukit ni Annie si Edelmar.

“Nganong gihimo mo man kini kanako, An?” Gisumbalik siya’g pangutana sa ulitawo. “Nganong nakahimo ka man sa pagpakigrelasyon sa laing lalaki? -- Sumpayan pa