Bawion ko ang imong gugma

Gula 74

Human sa ilang pagpangaon, misugyot si Melvin nga manan-aw sila’g sine. Misanong siya. Nanaka sila sa ikaduhang andana sa Elizabeth Mall. Nagpili sila’g pelikula nga maayong tan-awon.

Apan walay nauyonan si Annie sa mga pelikula nga gipasalida sa Elizabeth Mall. Maong nakahukom silang molahos ngadto sa Ayala. Maayo didto kay segurado gyud silang makapili sanglit daghan man og sinehan sa Ayala.

Tuod, may pelikula nga nagustohan si Annie. Iningles ang maong pelikula diin maoy bida si Catherine Zeta-Jones. Paborito ni Annie ang maong artista.

Apan sa didto na sila sulod sa sinehan, wala masulod sa utok ni Annie ang pelikula nga ilang gitan-aw. Naglatagaw ang iyang hunahuna. Ug sa kalayo sa panaw sa iyang utok, kanunay gayod kining adto mosangko kang Edelmar.

Nahanduraw karon ni Annie nga si Edelmar mahimong dakong hulga sa relasyon nila ni Melvin, ilabi na gayod sa umaabot nilang pagpakasal.

Hapon na sa pagpanggawas nila sa sinehan. Pero dili pa gustong mopauli si Annie. Gusto niyang lingawon ang iyang kaugalingon aron siya mahikalimot kang Edelmar. Nag-window shopping lang una sila.

Gabii na dihang gihatod si Annie ni Melvin ngadto sa ilang gipuy-an sa Pit-os. Wala na molahos si Melvin sa sulod sa balay. Kutob ra kini sa may koral. Nagdali usab kini sa pagpauli kay nag-anam na’g kalawom ang kagabhion.

Apan nakugang siya sa paghimuntog niya sa sala. Iyang namatikdan nga may tawo nga naglingkod nga nag-inusara. Si Edelmar! -- Sumpayan pa