Paggawas ni Brenda karong buntaga gikan sa Post Office sa ilang lungsod human nihulog og sulat, may nakasugat siyang tawo. Padulong ang tawo sulod sa Post Office. Nagsige’g tan-aw niya ang tawo. Nagsige’g pahiyom niya.
Unya niingon “maayong buntag misis?” Niyango la’g gamay si Brenda. Nipahiyom og hilaw. Wa siya katimbaya og tarong sa tawo. Kay wa siya kaila sa maong tawo. Wa gyud siya’y nahinumdoman kun diin sila nagkita. O kun diin sila nagkaila.
Maulaw man si Brenda moprangka sa tawo sa pag-ingon “kinsa man kadto ka? Sorry ha, kay nalimot gyud ko’g kinsa ka. Diin kadto ta nagkaila?”
Nobenta porsiyento sa tanang Pilipinhon, di gyud kaprangka’g istorya. Motagad lang gyud nga abig nakaila o nakahinumdom. Mopahiyom og gamay. Unya mopalayo dayon. Kay di gustong mabisto nga wa diay kaila sa nitimbaya.
Kasagaran, hisaypan hinuon nga garboso. Kadaghan na ni mahitabo sa kinabuhi ni bisan kinsa apan sa kinabuhi ni Brenda karon pa tingali.
Nag-atang na’g traysikol si Brenda sa daplin sa karsada tabok sa atbang sa Post Office. Aron makalahos siya’s iyang klinika. Usa man siya ka mananambal. Iyang bana manlalaban ug sayong nipagawas sa ilang kotse kay dunay out-of-town nga hearing. Usa pay ilang sakyanan kay di pa kamao mo-drayeb si Brenda ug bag-o pa silang nagsugod sa ilang mga propesyon.
Wa pa sila’y anak kay wa pay tuig gikan sa ilang kasal. School mate sila kaniadto sa University of San Sebastian. Samtang graduating si Andy sa law school si Brenda graduating sab sa Medicine. Nag-abot sila sa library usa ka hapon dihang may gi-research si Brenda nga Medico-Legal nga topic.
Nakamatikod si Andy nga naglisod si Brenda og pangita sa libro nga iyang gikinahanglan. Nadagsa ra man siya sa law library. Niboluntaryo og tabang si Andy sa dalaga. Diha nagsugod ilang panagkaila, panagsuod ug panag-uyab. Hangtud nisangko sa kaminyoon wa nagmahay si Brenda kay buotan iyang bana . Dili sama sa ubang manlalaban nga way “say” ang mga asawa kun asa sila maglakwatsa.
Dugay’ng nakasakay og traysikol si Brenda. Daghang gipalabay niya kay wa siya nahimutang. Nagsige siya’g hunahuna sa tawo nga mahigalaon kaayo nga nasugatan niya. Unya may traysikol nga nihunong gyud sa iyang tungod. Bisa’g wa niya paraha kay nakaila niya ang drayber nasayud kun asa siya padulong. Nisakay na lang si Brenda.
Samtang nagpanaw ang traysikol, nakahinumdom si Brenda nga sa niaging bulan, nibiyahe sila’s Andy sa silingang lungsod sa Peradeniya. Kay giimbitar sila’g paniudto sa usa ka kliyente nga nag-birthday. Na-plat ang ligid sa ilang kotse tungod sa usa ka panaderya. Natunok og dakong lansang ang atras nga tuong ligid.
Nipalit og pan si Brenda aron makapamalihog sa bakery kun may masugo ba nga tawo nga makailis sa ilang ligid. Di puwede si Andy mokamang kay wa siya’y dalang ilisan. Magkabuling iyang barong.
May lalaki nigawas sa panaderya nga nagpaila nga pag-umangkon siya sa tag-iya sa bakery. Gihuwaman niya ang yawe sa kotse para sa mga heramenta. Siya ang niboluntaryo nga moilis sa ligid. Samtang nagkadulusingot siya’g bomba sa mechanical jack may mga higalang mosampit niya matag karon ug unya. May molabay nga maglakaw ug may magsakay og traysikol.
“Kap! Maayo gyud kang tawo, da” maoy kasagarang timbaya sa mga tawong makalabay.
Pagkahuma’g ilis sa ligid, suholan unta nila ang tawo. Wa gyud nidawat bisa’g ilang gipugos. Nagpasalamat na lang sila’s Andy ug Brenda sa tawo.
“Nganong Kap may ilang tawag nimo?” ni Brenda.
“Barangay Kapitan man ko sa baryo Quillabamba” sa tawo nga mora’g naulaw pa sa iyang pag-angkon. Nangawot sa ulo.
Ug nahinumdom na si Brenda nga ang barangay kapitan diay tong kasugat niya.
“Balik ta’s Post Office, Dong!” daling mando ni Brenda sa drayber sa traysikol. Kay mangayo siya’g pasaylo sa hilaw niyang pagtagad sa tawong nakatabang nila og nautangan nila’g kabubut-on.
Pagsulod niya’s Post Office, wa na diha ang kapitan. Labihan gyung ulawa ni Brenda sa iyang kaugalingon. (Kataposan)