Naghilak nga Bituon

Gula 28

Sa iyang pamatyag, mora siya’g gisungog ni Ethan niining kahimtanga.

“Kun dili kuno ka makalibre ni Joan, dili na lang sab kuno siya motan-aw sa imong concert,” matud ni Gilda.

Emotional si Jackie. Sa iyang hunahuna, ingon sa nagpapresyo og maayo si Ethan. Siya na gani ang mihatag og pabor ngadto sa maong lalaki, siya pa hinuon ang gihatagan og kondisyon niini.

“Unsa may imong hukom, Day?” Gipahunat siya ni Gilda.

Wala dayon siya makatubag sa pangutana ni Gilda. Naghunahuna siya. Naghinuktok. Naglisod siya paghukom. Sa iyang paminaw, mora siya’g napiit sa duha ka solidong bungbong.

Importante alang kaniya ang presensiya ni Ethan. Gusto niyang makatambong gayod kini sa iyang konsiyerto sa Sugbo.

“Sige, Day,” hukom ni Jackie. “Mosugot ko nga ikuyog ni Ethan si Joan. Sama ninyo, librehon ko usab ang iyang admission.”

Segurado ka ba sa imong desisyon?” Mora’g maglisod pagtuo si Gilda.

“Bisan usa pa ka batallion ang ikuyog ni Ethan akong librehon. Ang importante alang kanako mao ang iyang presensiya.”

“J-Jackie...?”

“Maayo hinuon kun mokuyog si Joan kaninyo ni Ethan aron lakip siya makasaksi sa buhaton kong paukyab.”

“Makapaduda alang kanako ang imong sinultihan. May milagro ka bang buhaton?” -- Sumpayan pa