Naghilak nga Bituon

Gula 27

Pulos taga Sugbo sila si Nang Tinay ug Noy Teryo ug silingan nila ni Jackie didto sa Guadalupe sa dakbayan sa Sugbo.

Dihang maayo na ang dagan sa career ni Jackie, may misugyot kaniya nga ibaligya ang maong townhouse ug mopalit siya’g mas luho nga balay nga mas duol ra usab sa studio sa UBS-CVN. Apan wala niya tumana ang maong sugyot tungod kay may sentimental value kaniya kining townhouse nga iyang gipuy-an.

Mao pa lang gani pagsulod ni Jackie sa iyang lawak, mibagting ang iyang cellphone. Iya kining gidali pagkuha gikan sa iyang shoulder bag ug gisusi kun kinsa ang nanawag.

Si Gilda diay ang nanawag kaniya.

Gitubag ni Jackie ang tawag ni Gilda sa cellphone. Importante ang tuyo niini kaniya. Bahin kang Ethan. Sa gipamalihog niya niini paghimo’g arrangement aron pagseguro nga makatan-aw gayod si Ethan sa iyang first solo concert nga ipahigayon sa dakbayan sa Sugbo.

“May problema, Day,” taho ni Gilda.

“U-unsang problemaha, Day?” Sukit ni Jackie.

“Misanong si Ethan sa akong awhag nga manan-aw mi sa imong concert. Nalipay siya pagkasayod nga librehon mi nimo sa admission. Pero ikuyog niya si Joan.”

“U-unsa?”

“Mao kana, Day. Gusto niya nga sama namo, malibre sab unta si Joan pagsulod sa Cebu Coliseum. Wala una ko mopasalig niya kay basin dili ka mosugot.”

“Shit!” Mibati’g kalagot si Jackie. -- Sumpayan pa