Pinaskohan

Usa si Rudy sa mga bisita nga gidapit pagtambong sa Christmas party didto sa Camp Sotero Cabahug niadtong Disyembre.

Sayo nga miadto si Rudy ug samtang naglingkod siya ug nagpaabot pagsugod sa programa, may miabut nga maanyag nga babaye nga nangita sa higala niyang polis.

Nangutana kini kang Rudy kun nakaila ba siya ni Caloy, usa kuno ka polis. Mibalibad si Rudy nga wala siya makaila niini apan ang babaye diha ra nagsigi og tindog kilid sa iyang lamesa.

Gipaliraw sa babaye ang iyang mga mata sa palibot tingali nangita kini kang Caloy nga PO1 pa kuno ang ranggo nga iyang nakaila ug nangimbitar kaniya sa party.

“Pwede’g mangayo’g usa ka stick nga sigarilyo?” matud sa babaye ngadto ni Rudy. Manigarilyo diay ang maong babaye.

“Sure,” dali kaayong nakatubag si Rudy. “Lingkud usa Miss mentras magpaabot ka nga makit-an nimo si Caloy kay wala man sab ko’y kauban.”

Nagkaila-ila g’yud sila si Rudy ug ang babaye. Jenny diay ang ngalan niini nga taga barangay Lorega-San Miguel, paryente kini og usa ka opisyal sa barangay.

“Mangayo ko’g laing stick sa sigarilyo Rud bi,” matud ni Jenny. “Hala, wala na ra ba’y sigarilyo da. Maayo unta kun may masugo pa kay magpapalit ta,” matud ni Rudy.

“Bi ako na la’y palit Rud kay duna may baligya diha sa tindahan atbang sa kampo,” ni Jennifer pa nga mitindog dayon. Gitunolan ni Rudy og tibuok P200 si Jenny.

Taud-taud, mibalik kini nga nagdala na sa usa ka kaha nga sigarilyo ug gitunol kang Rudy ang sukli. “No, imo na kanang sukli Jen, keep the change.”

Mipahiyom si Jenny. “Thank you Rud ha? Sige ako na lay sugoa pirmi para maka-keep the change ko kanunay.”

Natimbang-timbang ni Rudy nga nanginahanglan og kwarta si Jenny. Nagsugod na ang party apan wala gayud ikakita ni Jenny si Caloy nga maoy iyang gipangita.

Sila na lang si Rudy ang nagpares sa lamesa. Dali ra kaayo sila nga nagkasuod. Gitimbaya si Rudy sa higala niya nga polis – si SPO3 Dicdican ug gipaila niya si Jenny nga iyang higala.

Mikuha si Dicdican og ilang mainom – usa ka botelya nga imported nga Fundador. Wala makatoo si Rudy kay moinom usab diay og hard drinks si Jenny. Samtang nagsultihanay si Rudy ug SPO3 Dicdican, nabantayan ni Rudy nga misugod na pagkaparaygon kaniya si Jenny. Mibai-id na kini kaniya. (Sumpayan)