Naghilak nga Bituon

Nagpatawag dayon og presscon si Joy Lorenzo human niini hatagi’g briefing sila si Jackie Rojas ug Jerome Celesta kun unsay ilang ipanubag sa taga media. Gitambongan ang maong presscon sa taga Enpress, usa sa labing dakong organisasyon sa entertainment media sa Manila, nga buot masayod sa gitawag ni Joy og “revelation” sa real score sa loveteam nila ni Jackie ug Jerome.

Atubangan sa press people giangkon kunohay nila ni Jackie ug Jerome nga may relasyon gayod sila ug three months na silang mag-on. Sa iyang kaugalingon, gipangilogan si Jackie sa iyang gisulti ngadto sa taga media. Gihilasan siyang naghunahuna sa iyang pagpangangkon sa relasyon nga dili tinuod.

Apan wala siya’y kapilian. Wala siya’y option kay kini lang ang kondisyon nga gihatag sa iyang manager kaniya aron motunhay ang iyang showbiz career ug mobalik ang kahumot sa loveteam nila ni Jerome. Mao nga giutong na lang niya ang tanang kagil-as.

Nanggawas dayon sa lainlaing mga pamantalaan sa kaulohan ang balita nga may relasyon gayod sa tinuod nga kinabuhi sila si Jackie ug Jerome. Gisibya usab kini sa mga istasyon sa radyo ug telebisyon. Sa hilom wala ikalipay ni Jackie ang maong hitabo tungod kay nakaseguro siyang makaapekto kini sa personal niyang kinabuhi. -- Sumpayan pa