Naghilak nga Bituon

Gula 19

Nahiubos si Jackie kang Ethan. Apan sa laing bahin, mibati usab siya’g kalibog sa batasan sa ulitawo. Lisod kaayong sabton ang kinaiya ni Ethan. Siya na gani ang mihagad sa iyang kaugalingon sa pagpakigsuod kang Ethan. Gipaubos niya ang iyang kaugalingon bisan sa kamatuoran nga ang katawhan naghangad na sa iyang kabantog. Apan giisnab ni Ethan ang iyang beauty.

Kun tukion gani pag-ayo, si Ethan ang angay mangita’g paagi aron mahiduol siya niini. Apan sukwahi ang nahitabo kay ang ulitawo na man hinuon ang midistansiya kaniya luyo sa iyang pagpaninguha nga magkasuod sila.

Mi-flop sa takilya ang labing ulahing pelikula nila ni Jackie Rojas ug Jerome Celesta. Gilangaw kini sa mga sinehen. Dako kaayo’g alkanse ang production outfit nga naggaling sa maong pelikula.

Ingon sa gipul-an na ang mga moviegoers sa loveteam nila ni Jackie ug Jerome. Sa feedback nga nakaabot kang Jackie ug sa iyang manager, wala nay bag-o sa tandem nila ni Jerome tungod kay nasayod na ang publiko nga on camera lang ang relasyon nilang duha. Wala nay “kilig,” matud pa.

“I think it’s now hightime aron angkonon ninyo ni Jerome sa media nga may relasyon kamo sa tinuod nga kinabuhi,” nagkanayon ang iyang manager nga si Joy Lorenzo nga usa pud ka Bisaya.

“Pero wala kami relasyon sa tinuod nga kinabuhi,” matud ni Jackie. That’s the real score between us.” -- Sumpayan pa