Bawion ko ang imong gugma

“Asa man ta mangita nianang kantidara, Nay?” Gisukit ni Annie ang inahan sa dihang nakalakaw na ang doktor.

“Ako’y mohatag nianang kantidara, An,” mihagad si Melvin pagtanyag sa panabang niini kanila.

“U-unsa?” Nakugang si Annie.

“Nagkinahanglan og dinaliang operasyon ang imong amahan,” ni Melvin. “Wa na kamo’y panahon sa pagpangita’g kuwarta nga igasto sa iyang operasyon.”

“Husto si Melvin, Annie,” misagbat si Nang Karing. “Kinahanglang ma-operahan sa labing daling panahon ang imong amahan. Busa, dawaton na lang nato ang gitanyag niyang panabang.”

Daklit nga naghunahuna si Annie. Daghang mga butang iyang gitimbang-timbang sa iyang hunahuna. Unya nakaumol siya’g hukom pagdawat sa gitanyag nga panabang ni Melvin.

Nahinayon gayod ang operasyon ni Noy Juan. Grabe gayod ang samad-dinunggaban nga naangkon sa amahan ni Annie tungod kay nahabwa man ang tinai niini.

Human maoperahi, si Noy Juan gidala ngadto sa surgical ward. Wala pa kini tangtangi sa oxygen kay talandogon pa gihapon ang kahimtang niini. Sila si Annie ug Nang Karing maoy magbanos-banos pagbantay kang Noy Juan. Ang mga manghod ni Annie igo lang modalikyat sa ospital aron pagsusi sa kahimtang sa ilang amahan kay pulos pa man sila nanagtungha. Ang duha ka manghod ni Annie nga nakatapos na sa hayiskol mao usay mopuli sa ilang inahan sa pagbantay sa ilang puwesto sa tindahan og buwad didto sa Carbon. -- Sumpayan pa