Pista sa among barangay

Petsa 3 ug 4 sa bulan sa Mayo, mao ang bispiras ug kasaulogan sa among kapistahan sa among barangay sa Tuboran nga sakop sa lungsod sa Bien Unido. Si Sr. San Isidro Labrador, mao ang patron sa kasaulogan sa maong kapistahan.

Alegre ang maong pista. Kay daghan mang mga kalingawan ang gidalit sa mga opisyales sa among barangay. Bunga kini sa mga paningkamot sa pinangga namong kapitan,nga si kapitan Ver-Ang.Ug uban sa iyang mga kagawad nga sila si Kag. Vers Qui, Kag. Rey Gar, Kag. Alvin, Kag. Erming ug uban pa.

Niadtong higayona grabi'ng pagmaya ang akong gibati. Kay gawas nga alegre, nahiuli usab ang akong maguwang lalaki,nga si Manoy Ongkang, nga dugay na kaayong wa kauli sa among dapit sa dugay nang panahon.Kay lagi, tua naman nanimpalad sa yuta sa Mindanao.

Sulod sa among balay, bisi kaayo si Manoy Ongkang, nga maoy nangunay og atiman sa mga mamistahay nga mga klasmet ra usab niya kaniadto sa high school. Human niya napakaon, iya dayon kining gidalitan og ilimnong makahubog nga mao say gipaabot-abot sa iyang mga klasmet. Tulo ka longnek 65 Tanduay ug tulo ka botelyang Lift softdrinks ang gidalit ni Manoy.

"Mga abay, kalingawi lang na ninyo'g tagay ha. Unya biyaan usa ta mo kay mosuroy usa ko sa akong mga barkada. Makighimamat usa ko nila. Unsaon nga karon paman lagi intawon ta kauli" pananghid ni Manoy Ongkang ngadto sa iyang mga klasmets nga didto niya gipahiluna sa among salakot tupad sa among balay.

Alas singko sa hapon, nauli na si Manoy nga nagsarasay na sa kahubog. Dinhi, medyo nibati ko'g kabalaka kay sayod nako sa batasan ni Manoy kun mao nay mahubog. Maburyong ra ba dayon ang ulo niini. Misamot ang akong kabalaka kay didto kini mipaingon sa among salakot diin tua pa ang iyang mga klasmets sukad pa kaganinang buntag. Dinhi ang akong kakulba misamot og lagobo nga nagsud-ong ni Manoy nga naglingolingo sa iyang ulo ug inubanan sa sipang panaguto.

"Oyyy ... mga abay ... naka-kaon namo ... hik..?" ni Manoy Ongkang, nga lango na gyud kaayo ang tonada sa kahubog. Ambot kaha. Kun nakalimot naba kaha ni siya, nga siya may nag-enterten aning mga tawhana.

"O, bay .... humana" tubag sa usa niya ka klasmet nga naglingkod sa may daplin nga mora'g nagpangita pa'g kaon ug inom.

"Unya.., hik...! Na...nakainom namo...? hik...!" sigundang pangutana sa akong maguwang dayong pasiplat sa lagaraw ni papa Tonyo nga gisandig lang sa may punoan sa bayabas.

"O, bay ... humana sad" tubag sa iyang mga klasmet nga halos nagkadungan ug nga medyo nibati'g kahadlok nga nagtan-aw ni Manoy Ongkang.

"Unya...! unsa pa may inyong gipangita...? hik....! Nakakaon namo...! nakainom namo...! unsa pamay inyong gipaabot ... patigbas mong mga kagwanga mo...!" ni Manoy Ongkang nga nawagtangan na's maayong buot tungod sa kahubog ug isog nga mikuha sa lagaraw nga dili ra halayo sa iyang gibarogan.

Niadtong higayona, mora ko'g nahimuot nga nibati usab og kaluoy nga naglantaw sa mga mamistahay nga mga klasmets ni Manoy Ongkang. Naglumbaanay kinig pangalibwag ug mora'g mga kwitis nga nanglayat sa among koral. Nakapanglingo ko's akong ulo nga nag alam-alam ni Manoy Ongkang nga nag-maoy na hinuon. Wa ko nagdahom nga mao kadtoy mahitabo sa pista sa among barangay. (Katapusan)