Sana, dalawa ang puso ko

Milampus g’yud si Albert. Nadala g’yud niya sa usa ka motel ang maanyag nga si Evelyn pipila lang ka adlaw gikan sa panagkaila nila sa usa ka tunghaan dinhi sa dakbayan.

“Lyn, Lyn, makabuang ang imong kaanyag..ohmmm,” daw nagsalimoang si Albert dihang gisugdan na niya pagpakaligo’g mga hawok si Evelyn pagsulod pa lang nila sa kwarto sa usa ka motel sa V. Rama Avenue.

Gigamit ni Albert ang tanan niyang naantigohang pamaagi pagromansa’g babaye ug wala siya mosipyat, natagbaw g’yud kaayo si Evelyn sa iyang gihimo ug gani nakatulog kini human sa makapoy nila nga kumbati.

May anak si Evelyn apan wala kini bana. Ang bugtong anak ni Evelyn nagtungha sa Kinder Garten.

Kini maoy rason nga nagkakita sila si Albert kinsa usa ka buntag niadto maoy mihatud sa iyang anak sa tunghaan. Bigot gihapon kaayo ang panglawas ni Evelyn.

Atul sa una nila nga panagkita may dinalian nga project nga gihatag ang maestra nga kinahanglang paliton dayon ug i-submit inigka-ugma.

“Paita ani uy, naatul pa g’yud kining dinalian nga project nga wala pay sweldo. Dili na man gani makaabut ning akong budget sa tapus-buwan unya ibanan pa hinoon sa project,” nadunggan ni Albert nga nagbagolbol si Evelyn.

Nalooy siya sa babaye nga dili pa gani niya higala niadtong higayuna. “Ayaw na og himoa nga problema Ma’am, ako nay mopalit sa kinahanglanon sa imong anak. Kay pareho man ta og requirements, duhaon nako pagpalit,” giingnan ni Albert si Evelyn.

Wala makatingug si Evelyn. Igo ra kini nga mitutok kaniya, unya taud-taud mibalibad. “Ayaw lang uy, maikog ko nimo.”

“Sige na ayaw na himoa nga problema ang gihatag nga project sa maestra. Yuna, hatagi diay ko sa imong contact numbers kay teksan tika kun mapalit na nako para imong makuha,” ni Albert pa.

Nagbayloay sila’g contact numbers si Albert ug Evelyn. Kadto na maoy sinugdanan sa ilang subsob na nga kumunikasyon. Gipalit dayon ni Albert ang gikinahanglan sa project sa iyang anak ug sa anak ni Evelyn.

Nagsabut sila si Evelyn nga magkita sa usa ka fastfood store duol sa tunghaan sa ilang anak ug nag-order nang daan si Albert og makaon para kanila. Gisud-ong g’yud pag-ayo ni Albert si Evelyn, wala g’yud siya masayup, gwapa g’yud kini kaayo. (Sumpayan)