Bawion ko ang imong gugma - Gula 60

Si Melvin nagpadayon usab sa pagpangulitawo ni Annie. Apan wala gayod siya magpatental sa maong lalaki. Bisan kun wala nay komunikasyon sila si Edelmar apan padayon siyang milaom nga balikon siya sa iyang hinigugma. Samtang dili pa niya masuta ang matuod nga hinungdan kun nganong wala na mosulat ug mo-text si Edelmar kaniya, magpabilin siyang maglaom sa pagbalik sa iyang hinigugma. Maong wala gayod siya magpadala sa mga hangyo ni Melvin.

Usa ka adlaw niana, nakahunahuna si Annie nga makigkita sa mga ginikanan ni Edelmar sa Lahug. Gusto siyang magpakisusi. Gusto siyang manguha og bisan unsang kasayoran bahin kang Edelmar.

Iyang nasayran nga gipatukoran diay ni Edelmar og balay ang mga ginikanan niini sa Lahug. Nagsugod na ang pagtrabaho sa maong balay.

“Pirme man siyang magpadala og kuwarta namo, Day,” nagkanayon ang amahan ni Edelmar nga si Noy Ben. “Niadto ganing miaging semana nakadawat na man sab mi’g kuwarta gikan niya alang igasto sa pagpatrabaho sa balay nga iyang gipatukod para namo.” “Kay ngano man diay, Day?” Usisa sa inahan ni Edelmar nga si Nang Sita.” Nga nagsusi ka man?”

“Dugay na man gud siyang wa magsuwat nako, Nang,” tubag ni Annie. “Di na sab nako makontak ang iyang cellphone. Kapin na sa tulo ka bulan nga wa mi komunikasyon. Wa na koy kasayoran bahin kaniya.”

“Uy, ngano man kaha?” Sa inahan pa. “Kanunay man siyang magsuwat namo. Pero wa sab hinuon siya maghisgot sa iyang suwat bahin nimo.”

“Nahisagmuyo pag-ayo si Annie sa kasayoran nga iyang nakuha. Iyang nahanduraw karon nga ingon sa wala na siya’y bili alang kang Edelmar. Nahikalimot na gayod tingali kaniya sa hingpit. -- Sumpayan pa