Gula 59
Dili na usab makontak ang cellphone ni Edelmar. Sa higayon nga iya kining kontakon, may motubag sa paingon nga: “Sorry, all circuits are busy.” Niini, mibati na’g kabalaka si Annie. Unsa man kahay nahitabo sa iyang hinigugma nga wala na man kini mosulat kaniya? Nag-ilis kaha usab kini og numero sa cellphone mao nga dili na niya makontak?
Nahikalimot na kaha si Edelmar kaniya? Kun gihatagan siya’g importansiya sa iyang hinigugma, pahibaluon gayod unta siya niini kun mag-ilis kini’g numero sa cellphone, pero wala. Dili na niya makontak si Edelmar. Wala siya masayod kun unsay hinungdan.
Unya, may laing mga pangutana nga takulahaw lang mililas sa iyang kaisipan nga nakadugang sa iyang kabalaka. May lain kahang babaye nga gikabuangan si Edelmar didto sa London? May gipuli na kaha ang iyang hinigugma sa iyang dapit sa kasingkasing niini mao nga nahikalimot na kini kaniya. Kini karon ang lintunganay sa iyang kabalaka.
Misamot pa gayod ang iyang kabalaka dihang nahinumdom siya kang Melinda, ang suod nga higala ni Edelmar nga maoy kauban niini sa pag-adto sa London. Wala niya kalikayi nga magduda nga tingalig nagkatakdo na ang mga pagbati nila ni Edelmar ug Melinda. Misantop sa iyang hunahuna nga gumikan sa dugay nang panag-uban nila ni Edelmar ug Melinda, na-develop ang ilang mga pagbati sa usa’g-usa.
Mibati og insecurity si Annie. Mag-unsa na man lang siya kun tinuod ang iyang katahap? Gikatahan na ra ba niya ngadto kang Edelmar ang iyang bandila. Gitugyan na niya sa iyang hinigugma ang iyang pagka-babaye. Naangkon na ni Edelmar ang iyang kaputli. Karon pa siya nakaamgo nga siya’y alkanse kun magluib si Edelmar sa ilang relasyon. -- Sumpayan pa