Bawion ko ang imong gugma

Gula 55

“Pag-amping dd2. Ug gud luk sa u trabaho,” balos niyang text ngadto ni Edelmar.

“Tanx, I luv u,” reply sab ni Edelmar sa iyang text.

Gibati ni Annie ang tumang kamingaw sa iyang hinigugma.

Lahi ang kamingaw nga gibati ni Annie kang Edelmar sa didto pa kini sa Ormoc kun itandi karon nga atua na ang iyang hinigugma sa London. Mas tidlom ang kamingaw nga iyang gibati karon gumikan sa paghunahuna nga layo kaayo ang London sa Pilipinas.

Apan walay bugto ang komunikasyon nila ni Annie ug Edelmar. Ang ilang panaglagyo gidugtong sa walay puas nilang pagteksanay. Dili pa matagbaw sa text, mopadala gayod og sulat si Edelmar kaniya aron ikasaysay niini ang tanan nga buot niining ipadayag kaniya nga dili mahimo sa text lang.

Makunhoran og diyotay ang kamingaw ni Annie sa hinigugma sa higayon nga makabasa siya sa mga text niini. Sa higayon nga bation siya’g kalaay sa balay, iyang subli-sublion pagbasa ang mga sulat nga gipadala ni Edelmar kaniya nga naghulagway sa pagsugilon bahin sa kahimtang niini ngadto sa London.

Apan ang mga text ug sulat ni Edelmar dili gayod makapuypoy sa hingpit sa kamingaw ni Annie. Kun mahimo pa lang nga apurahon niya ang pagpangligid sa mga adlaw, iya na kining gihimo aron dali rang matapos ang duha ka tuig ug magkakita na sila pag-usab ni Edelmar.

Dakong sakripisyo alang kang Annie ang panaglagyo nila ni Edelmar. Kundili pa lang tungod kay nakatugkad siya sa maayong tumong sa iyang hinigugma, dili gayod unta siya mosugot nga moadto kini sa London tungod kay dili siya buot nga magkalagyo sila. -- Sumpayan pa