Naghilak nga Bituon

Apan dili sila ang gihugopan sa mga tawo kundili si Jackie. Nasayod ang mga tawo nga mo-perform karon si Jackie sa CICC isip highlight sa pagsubo sa bag-ong proyekto.

Gisugdan dayon ang tulomanon. Human sa ribbon cutting, mihatag og pakigpulong ang pipila sa mga politiko nga mitambong sa okasyon. Ang matag pakig-pulong sal-otan sa presentations ni Jackie diin misayaw siya ug mikanta. Mihugyaw ang katawhan dihang giawit na ni Jackie ang career single sa iyang debut album nga “Teach Me To Love.”

Human sa tulomanon, gipahigayon ang autograph signing. Gipunsisokan si Jackie sa iyang mga fans nga nagpa-sign og autograph kaniya. Pagkahuman, nakahigayon gayod siya sa pagpakigsulti kang Ethan didto sa iyang locker room.

Sila rang duha ni Jackie ug Ethan sulod sa iyang locker room. Si Gilda nga maoy nangita’g paagi nga magkakita sila migawas aron paghatag kanila’g higayon nga magkasulti og maayo.

“Kumosta ka na?” Si Jackie ang mibukas sa ilang panagsulti kay iyang namatikdan nga nagpakahilom lang si Ethan.

“M-maayo man,” tubag ni Ethan nga nasabtan kaayo niya nga may kataha ug kauwaw kini nga gibati.

“Salamat nga gisanong nimo ang akong pagdapit,” ni Jackie pa.

“Kinsa man kaha ko nga mobalibad sa pagdapit sa usa ka sikat nga artista sa puting tabil,” ni Ethan pa. “Gawas pa, managhigala ta sukad pa kaniadto. Nalipay gani ko nga bisan dili na ka ma-reach tungod sa imong kabantog, wala ka pa gihapon malimot nako nga usa sa imong mga higala.” -- Sumpayan pa